ای چالان میں موٹرسائیکل نے سنچری کردی، جرمانہ جان کر ہوش اڑ گئے
لاہور: شہر میں ٹریفک قوانین کی خلاف ورزیوں کا ایک منفرد واقعہ سامنے آیا ہے جہاں ایک موٹرسائیکل کے ای چالان کی تعداد 100 سے تجاوز کرگئی۔ ٹریفک پولیس نے اسکیم موڑ کے قریب کارروائی کرتے ہوئے موٹرسائیکل کو تحویل میں لے لیا، جس پر مجموعی طور پر 1 لاکھ 97 ہزار 200 روپے جرمانہ واجب الادا نکلا۔
ٹریفک پولیس کے مطابق پٹرولنگ آفیسر نے اسکیم موڑ کے قریب ایک موٹرسائیکل سوار کو بغیر ہیلمٹ سفر کرتے ہوئے روکا۔ معمول کی کارروائی کے دوران موٹرسائیکل کا ای چالان ریکارڈ چیک کیا گیا تو پولیس کو معلوم ہوا کہ اس کے خلاف پہلے ہی متعدد ٹریفک خلاف ورزیاں ریکارڈ ہوچکی ہیں۔
پولیس کے مطابق موٹرسائیکل کے ریکارڈ میں مجموعی طور پر 104 چالان سامنے آئے، جن میں سب سے زیادہ خلاف ورزیاں بغیر ہیلمٹ موٹرسائیکل چلانے سے متعلق تھیں۔ ریکارڈ کے مطابق موٹرسائیکل سوار نے 98 مرتبہ بغیر ہیلمٹ سفر کرکے ٹریفک قوانین کی خلاف ورزی کی۔
ٹریفک پولیس کا کہنا ہے کہ مذکورہ موٹرسائیکل سوار کی جانب سے صرف ہیلمٹ کی خلاف ورزی ہی نہیں کی گئی بلکہ لین لائن کی پابندی بھی متعدد مرتبہ نظر انداز کی گئی۔ ریکارڈ کے مطابق 5 مرتبہ لین لائن کی خلاف ورزی بھی سامنے آئی۔
پولیس کے مطابق تمام خلاف ورزیوں کے نتیجے میں موٹرسائیکل پر مجموعی طور پر 1 لاکھ 97 ہزار 200 روپے جرمانہ واجب الادا تھا۔ کارروائی کے دوران موٹرسائیکل کو تھانے میں بند کردیا گیا۔
ٹریفک پولیس کا کہنا ہے کہ ای چالان سسٹم کے ذریعے ٹریفک قوانین کی خلاف ورزیوں کا ریکارڈ محفوظ کیا جا رہا ہے، جس سے بار بار قانون توڑنے والے موٹرسائیکل سواروں اور ڈرائیورز کے خلاف کارروائی میں مدد مل رہی ہے۔
حکام شہریوں پر زور دیتے ہیں کہ موٹرسائیکل چلاتے وقت ہیلمٹ کا استعمال لازمی کریں، لین ڈسپلن کی پابندی کریں اور دیگر ٹریفک قوانین پر عملدرآمد یقینی بنائیں۔ ٹریفک قوانین کی مسلسل خلاف ورزی نہ صرف جرمانوں کا باعث بنتی ہے بلکہ سڑک پر حادثات کے خطرات میں بھی اضافہ کرسکتی ہے۔
لاہور ٹریفک پولیس کی جانب سے مختلف شاہراہوں اور علاقوں میں ٹریفک قوانین پر عملدرآمد کے لیے کارروائیاں جاری ہیں۔ حکام کے مطابق ای چالان ریکارڈ کی مدد سے خلاف ورزیوں کی نشاندہی اور قانون کے مطابق کارروائی کا سلسلہ جاری رکھا جائے گا۔
