5300 برس قدیم انسانی باقیات سے گردے یا مثانے کی پتھری دریافت

روس میں ماہرینِ آثارِ قدیمہ نے 5300 برس قدیم انسانی باقیات سے انگور کے برابر ایک پتھری دریافت کی ہے، جسے گردے یا مثانے کی پتھری قرار دیا جا رہا ہے۔ یہ دریافت نہ صرف قدیم انسانی بیماریوں بلکہ ہزاروں سال پہلے لوگوں کو درپیش طبی مسائل کے حوالے سے بھی اہم معلومات فراہم کرتی ہے۔

غیر ملکی میڈیا کے مطابق یہ دریافت جنوب مغربی روس کے علاقے اسٹاوروپول اپ لینڈ میں کانسی کے ابتدائی دور کے ایک قدیم مقبرے کی کھدائی کے دوران سامنے آئی۔ ماہرین کو یہاں ایک قدیم تدفینی مقام ملا، جسے اس زمانے کی روایت کے مطابق مٹی کا بڑا ٹیلہ بنا کر تیار کیا گیا تھا۔ ایسے مقبروں کو آثارِ قدیمہ کی اصطلاح میں کرگن کہا جاتا ہے۔

کھدائی کے دوران ماہرین کو زیرِ زمین ایک قبر نما کمرہ ملا، جہاں تقریباً 40 سالہ شخص کا ڈھانچا موجود تھا۔ اس کے کولہے کے قریب کوارٹز سے تیار کردہ تیر کا ایک پھل بھی دریافت ہوا، جو اس دور میں استعمال ہونے والے ہتھیاروں اور تدفینی اشیا کے بارے میں معلومات فراہم کرتا ہے۔

تحقیق کے مطابق انسانی باقیات کے قریب ملنے والی پتھر جیسی چیز کی ساخت اور جسامت گردے یا مثانے میں بننے والی پتھری سے مطابقت رکھتی ہے۔ اس کا حجم تقریباً ایک انگور کے برابر بتایا گیا ہے۔ ماہرین کا خیال ہے کہ یہ پتھری اس شخص کی زندگی میں پیش آنے والے سنگین طبی مسائل کا ثبوت ہو سکتی ہے۔

تحقیق کی مرکزی مصنفہ اور روس کی لومونوسوف ماسکو اسٹیٹ یونیورسٹی سے وابستہ ماہرِ بشریات نتالیہ بریزینا کے مطابق اس شخص کو ممکنہ طور پر پیشاب کی نالی کے دائمی انفیکشن کا سامنا تھا۔ یہ کوئی عارضی بیماری نہیں تھی بلکہ طویل عرصے تک برقرار رہنے والی تکلیف دہ کیفیت ہو سکتی تھی۔

محققین کا خیال ہے کہ انفیکشن اور اس سے پیدا ہونے والی پیچیدگیوں کے باعث اس شخص نے زندگی کے آخری برسوں میں مسلسل شدید درد برداشت کیا ہوگا۔ تاہم دستیاب شواہد کی بنیاد پر اس کی بیماری کی حتمی نوعیت اور موت کی وجہ کا تعین کرنا ممکن نہیں۔

ماہرین کے مطابق یہ دریافت اس بات کی نشاندہی کرتی ہے کہ گردے اور مثانے کی پتھری جیسے طبی مسائل جدید دور تک محدود نہیں بلکہ ہزاروں سال پہلے بھی انسان ان بیماریوں کا شکار ہوتے تھے۔ قدیم انسانی باقیات سے ملنے والے ایسے شواہد ماضی میں بیماریوں کی نوعیت، انسانی صحت اور علاج معالجے کی تاریخ کو سمجھنے میں اہم کردار ادا کرتے ہیں