قطری اور پاکستانی تجویز پر واشنگٹن اور تہران کے درمیان سنجیدہ مذاکرات بحال ہونے کا دعویٰ

امریکا اور ایران کے درمیان جاری کشیدگی کے خاتمے کے لیے سفارتی کوششوں میں اہم پیش رفت سامنے آئی ہے، جہاں قطری اور پاکستانی تجویز پر دونوں ممالک کے درمیان سنجیدہ مذاکرات کا سلسلہ دوبارہ شروع ہونے کا دعویٰ کیا گیا ہے۔ مذاکرات میں ایران کے جوہری پروگرام، یورینیم افزودگی اور آبنائے ہرمز کی صورتحال سمیت اہم معاملات زیر بحث ہیں۔

العربیہ کی رپورٹ کے مطابق امریکا اور ایران کے درمیان ممکنہ معاہدے کے لیے مختلف تجاویز پر بات چیت جاری ہے، جبکہ واشنگٹن نے ایران کو 3.67 فیصد تک یورینیم افزودگی کی اجازت دینے پر رضامندی ظاہر کردی ہے۔ اس کے علاوہ ایران میں بین الاقوامی جوہری معائنہ کاروں کی واپسی کے انتظامات پر بھی غور کیا جا رہا ہے تاکہ جوہری سرگرمیوں کی نگرانی اور شفافیت کو یقینی بنایا جاسکے۔

رپورٹ کے مطابق امریکا نے ایران سے مطالبہ کیا ہے کہ وہ اپنے پاس موجود 60 فیصد تک افزودہ یورینیم کی سطح کم کرے۔ اس مقصد کے لیے کسی تیسرے ملک کی معاونت حاصل کرنے کی تجویز بھی زیر غور ہے، جس کے ذریعے ایران کے ذخیرہ شدہ افزودہ یورینیم کو محفوظ مقام پر منتقل کرنے یا اس کی افزودگی کی سطح کم کرنے کے امکانات کا جائزہ لیا جا رہا ہے۔

العربیہ کے مطابق یورینیم افزودگی میں کمی سے متعلق ابتدائی معاہدہ طے پانے کی توقع ہے، تاہم اس حوالے سے حتمی اتفاق رائے کے لیے دونوں فریقوں کے درمیان مزید مشاورت جاری ہے۔

مجوزہ معاہدے کا ایک اہم حصہ ایران کے منجمد مالی اثاثوں کی بحالی بھی ہے۔ اطلاعات کے مطابق امریکا ایران کے 6 سے 9 ارب ڈالر کے منجمد اثاثے جاری کرنے پر غور کر رہا ہے۔ اس اقدام کو مذاکرات میں پیش رفت اور دونوں ممالک کے درمیان اعتماد سازی کے لیے اہم قرار دیا جا رہا ہے۔

دوسری جانب آبنائے ہرمز کو دوبارہ کھولنے اور خطے میں بحری ناکہ بندی فوری ختم کرنے کی تجویز بھی مذاکرات کا حصہ ہے۔ آبنائے ہرمز عالمی توانائی کی ترسیل کے لیے انتہائی اہم سمندری گزرگاہ ہے، جہاں کشیدگی کے باعث عالمی تیل کی سپلائی اور قیمتوں پر اثرات مرتب ہونے کا خدشہ رہتا ہے۔

تجزیہ کاروں کے مطابق اگر واشنگٹن اور تہران مجوزہ نکات پر اتفاق کرنے میں کامیاب ہوگئے تو اس سے نہ صرف خطے میں کشیدگی کم ہوسکتی ہے بلکہ عالمی توانائی منڈی اور بین الاقوامی تجارت پر بھی مثبت اثرات مرتب ہونے کی توقع ہے۔ تاہم مذاکرات کی کامیابی اور معاہدے کی حتمی شکل کے حوالے سے ابھی مزید پیش رفت کا انتظار ہے۔