تربیلا ڈیم کے مرکزی ڈھانچے کو کوئی خطرہ نہیں، ٹنل حادثے کی جامع انکوائری کا حکم
تربیلا ڈیم کے پانچویں توسیعی پن بجلی منصوبے کی تعمیراتی ٹنل کا ایک حصہ منہدم ہونے کے واقعے کے بعد واپڈا نے حادثے کی وجوہات جاننے کے لیے جامع محکمانہ انکوائری شروع کرنے کا فیصلہ کیا ہے۔ چیئرمین واپڈا لیفٹیننٹ جنرل (ر) محمد سعید نے جائے حادثہ کا دورہ کیا اور متعلقہ حکام کو واقعے کے تمام پہلوؤں کا تفصیلی جائزہ لے کر رپورٹ پیش کرنے کی ہدایت کی ہے۔ واپڈا کے مطابق حادثے کے باوجود تربیلا ڈیم کے مرکزی ڈھانچے اور اہم تنصیبات کو کوئی خطرہ لاحق نہیں۔
وزیراعظم شہباز شریف کی جانب سے واقعے کا نوٹس لینے اور تفصیلی رپورٹ طلب کیے جانے کے بعد چیئرمین واپڈا نے تربیلا فائیو توسیعی منصوبے کی سائٹ کا دورہ کیا۔ اس موقع پر انہیں ٹنل کے متاثرہ حصے، حادثے کی ممکنہ وجوہات اور واقعے کے بعد کیے جانے والے فوری اقدامات کے بارے میں بریفنگ دی گئی۔ چیئرمین واپڈا نے صورتحال کا معائنہ کرتے ہوئے متعلقہ حکام کو ہدایت کی کہ حادثے کے اسباب کا باریک بینی سے جائزہ لیا جائے تاکہ اصل وجوہات سامنے لائی جا سکیں۔
واپڈا ترجمان کے مطابق حادثے سے نمٹنے کے لیے فوری اقدامات پر عمل درآمد شروع کر دیا گیا ہے، جبکہ کنسلٹنٹس کو بھی ہدایت کی گئی ہے کہ وہ واقعے سے متعلق اپنی تفصیلی رپورٹ جلد پیش کریں۔ محکمانہ انکوائری میں ٹنل کے متاثرہ حصے کے منہدم ہونے کی وجوہات، تعمیراتی صورتحال اور ممکنہ ذمہ داریوں کا جائزہ لیا جائے گا۔
چیئرمین واپڈا نے منصوبے کی تکمیل میں تاخیر کم کرنے کے لیے ہنگامی حکمت عملی تیار کرنے کا حکم بھی دیا ہے۔ ان کا کہنا تھا کہ حادثے کے بعد ضروری اقدامات کرتے ہوئے منصوبے پر کام کی پیش رفت اور مقررہ اہداف کو مدنظر رکھا جائے۔
تربیلا فائیو توسیعی منصوبہ عالمی بینک اور ایشیائی انفراسٹرکچر انویسٹمنٹ بینک کی مالی معاونت سے تعمیر کیا جا رہا ہے۔ منصوبے کی تکمیل کے بعد تربیلا ڈیم سے مزید 1530 میگاواٹ بجلی پیدا کرنے کی صلاحیت حاصل ہوگی، جس سے ملک میں بجلی کی پیداوار بڑھانے اور توانائی کی ضروریات پوری کرنے میں مدد ملنے کی توقع ہے۔
دوسری جانب وزیراعظم شہباز شریف نے ٹنل کا تعمیراتی حصہ منہدم ہونے کے واقعے پر متعلقہ حکام سے تفصیلی رپورٹ طلب کر رکھی ہے۔ ذرائع کے مطابق وزیراعظم نے واقعے کے پس منظر، ممکنہ اسباب، نقصانات اور ذمہ داریوں کے تعین سے متعلق تمام حقائق پیش کرنے کی ہدایت کی ہے۔
واپڈا کی انکوائری رپورٹ اور کنسلٹنٹس کی تکنیکی جانچ کے بعد حادثے کی اصل وجوہات سامنے آنے کی توقع ہے۔ حکام کے مطابق ڈیم کے مرکزی ڈھانچے اور اہم تنصیبات محفوظ ہیں، تاہم منصوبے کے متاثرہ حصے کی صورتحال اور آئندہ تعمیراتی اقدامات کا جائزہ لیا جا رہا ہے۔
