عالمی منڈی میں سونا اور چاندی سستے، خام تیل، پلاٹینم اور پیلیڈیم مہنگے ہو گئے
اسلام آباد( نیوز ڈیسک )عالمی کموڈٹی مارکیٹ میں جمعرات کے روز سونے اور چاندی کی قیمتوں میں کمی جبکہ خام تیل، پلاٹینم اور پیلیڈیم کی قیمتوں میں اضافہ ریکارڈ کیا گیا۔ ماہرین کے مطابق امریکا اور ایران کے درمیان بڑھتی ہوئی کشیدگی اور امریکی مالیاتی پالیسی کے باعث عالمی منڈی میں غیر یقینی صورتحال برقرار ہے۔
عالمی صرافہ مارکیٹ میں اسپاٹ گولڈ کی قیمت 0.4 فیصد کمی کے بعد 4,060.46 ڈالر فی اونس جبکہ چاندی کی قیمت 0.9 فیصد کمی کے ساتھ 57.77 ڈالر فی اونس ریکارڈ کی گئی۔ دوسری جانب پلاٹینم 0.8 فیصد اضافے کے بعد 1,591.13 ڈالر اور پیلیڈیم 1,223.95 ڈالر فی اونس تک پہنچ گیا، جبکہ خام تیل کی قیمتوں میں بھی اضافہ دیکھا گیا۔
ماہرین کے مطابق آبنائے ہرمز میں امریکا اور ایران کے درمیان بڑھتی کشیدگی نے تیل کی عالمی رسد اور مہنگائی سے متعلق خدشات میں اضافہ کر دیا ہے۔ دوسری جانب امریکی شرح سود طویل عرصے تک بلند رہنے کے امکانات کے باعث سرمایہ کار سونے کے بجائے دیگر سرمایہ کاری کے ذرائع کو ترجیح دے رہے ہیں۔
بینک آف امریکا نے 2026 کے لیے سونے کی اوسط قیمت کی پیش گوئی میں 14 فیصد کمی کرتے ہوئے اسے 4,360 ڈالر فی اونس تک محدود کر دیا ہے۔
