وفاقی حکومت کا ہائی اسپیڈ ڈیزل پر لیوی میں اضافہ، ڈیزل 32 روپے سے زائد سستا
اسلام آباد: وفاقی حکومت نے پٹرولیم مصنوعات کی نئی قیمتوں کا اعلان کرتے ہوئے ہائی اسپیڈ ڈیزل پر پٹرولیم لیوی میں ایک روپے 72 پیسے فی لیٹر اضافہ کردیا ہے، تاہم دوسری جانب ڈیزل کی قیمت میں بڑی کمی کردی گئی ہے۔
نئی شرح کے مطابق ہائی اسپیڈ ڈیزل پر پٹرولیم لیوی 78 روپے 28 پیسے سے بڑھا کر 80 روپے فی لیٹر کردی گئی ہے، جبکہ پٹرول پر عائد لیوی 80 روپے فی لیٹر برقرار رکھی گئی ہے۔
حکومت کی جانب سے جاری نئی قیمتوں کے مطابق ہائی اسپیڈ ڈیزل کی قیمت میں 32 روپے 63 پیسے فی لیٹر کمی کی گئی ہے، جس کے بعد ڈیزل کی نئی قیمت 363 روپے 6 پیسے فی لیٹر مقرر ہوگئی ہے۔
دوسری جانب پٹرول کی قیمت میں 2 روپے 97 پیسے فی لیٹر اضافہ کیا گیا ہے، جس کے بعد پٹرول کی نئی قیمت 337 روپے 51 پیسے فی لیٹر ہوگئی ہے۔
پٹرول اور ڈیزل دونوں پر 5 روپے فی لیٹر کلائمیٹ سپورٹ لیوی بھی عائد ہے، جس کے باعث پٹرولیم مصنوعات پر مجموعی ٹیکس و لیوی کا بوجھ برقرار ہے۔
نئی قیمتوں کا اطلاق 20 اگست 2026 سے ہوا ہے۔ ڈیزل کی قیمت میں نمایاں کمی سے ٹرانسپورٹ، زراعت اور مال برداری کے شعبوں کو کسی حد تک ریلیف ملنے کی توقع ہے، تاہم پٹرول مہنگا ہونے سے عام صارفین کے سفری اخراجات متاثر ہوسکتے ہیں۔
