گھوٹکی میں ماری انرجیز کی تیل و گیس تلاش کرنے کی لیز میں 40 سال کی توسیع
حکومت نے ماری انرجیز کو سندھ کے ضلع گھوٹکی میں تیل اور گیس کی تلاش و پیداوار جاری رکھنے کے لیے مزید 40 سال کی ڈویلپمنٹ اینڈ پروڈکشن لیز دے دی ہے۔
لیز کی تجدید کے بعد کمپنی نومبر 2065 تک گھوٹکی میں تیل و گیس کی تلاش اور پیداوار کا عمل جاری رکھ سکے گی۔ تاہم نئی لیز معاہدے میں طے کردہ شرائط پر عمل درآمد سے مشروط ہوگی۔
ماری انرجیز کے مطابق لیز میں توسیع سے علاقے میں توانائی اور فوڈ سیکیورٹی کے حوالے سے کمپنی کا کردار مزید مضبوط ہوگا۔ کمپنی نے اس پیش رفت سے اپنے شیئر ہولڈرز اور پاکستان اسٹاک ایکسچینج کو بھی باضابطہ طور پر آگاہ کر دیا ہے۔
گھوٹکی پاکستان کے اہم توانائی پیدا کرنے والے علاقوں میں شمار ہوتا ہے، جہاں تیل و گیس کے ذخائر ملکی توانائی کی ضروریات پوری کرنے میں اہم کردار ادا کرتے ہیں۔ لیز کی طویل مدتی تجدید سے علاقے میں تلاش، پیداوار اور متعلقہ توانائی منصوبوں میں مسلسل سرمایہ کاری کی راہ ہموار ہونے کی توقع ہے۔
ماری انرجیز ملک کی توانائی کی ضروریات پوری کرنے کے لیے تیل و گیس کی تلاش اور پیداوار کے شعبے میں سرگرم اہم کمپنیوں میں شامل ہے۔ کمپنی کی جانب سے گھوٹکی میں سرگرمیوں کا تسلسل مقامی سطح پر توانائی کے وسائل سے استفادہ بڑھانے کے ساتھ ملکی پیداوار میں بھی کردار ادا کر سکتا ہے۔
حکومت کی جانب سے لیز کی 40 سالہ تجدید ایسے وقت میں سامنے آئی ہے جب پاکستان اپنی توانائی کی ضروریات پوری کرنے اور درآمدی ایندھن پر انحصار کم کرنے کے لیے مقامی تیل و گیس کے ذخائر کی تلاش پر توجہ دے رہا ہے۔
کمپنی کا کہنا ہے کہ طویل مدتی لیز سے گھوٹکی میں موجود توانائی کے وسائل کو مزید مؤثر انداز میں استعمال کرنے اور مستقبل میں تلاش و پیداوار کی سرگرمیوں کو جاری رکھنے میں مدد ملے گی۔
