اورکزئی پولیس کی کارروائی، منشیات کے مقدمات میں مطلوب اشتہاری مجرم سمیت دو ملزمان گرفتار
اورکزئی کے علاقے کلایہ میں پولیس نے کارروائی کرتے ہوئے منشیات کے مقدمات میں مطلوب اشتہاری مجرم سمیت دو ملزمان کو گرفتار کر لیا۔ کارروائی کے دوران ملزم کے قبضے سے آئس اور ایک پستول بمعہ ایمونیشن بھی برآمد کیا گیا۔
پولیس کے مطابق ڈسٹرکٹ پولیس آفیسر اورکزئی شوکت علی کی ہدایات پر جرائم پیشہ عناصر کے خلاف کارروائیاں جاری ہیں۔ اسی سلسلے میں ڈی ایس پی لوئر محبوب خان کی قیادت میں ایس ایچ او تھانہ کلایہ ناصر خان نے پولیس نفری کے ہمراہ دورانِ ناکہ بندی کارروائی کی۔
کارروائی کے دوران پولیس نے منشیات کے مقدمات میں مطلوب اشتہاری مجرم ہجرت ولد قمیض خان، سکنہ ستوری خیل، اور محمد امین ولد سید احمد کو گرفتار کر لیا۔
پولیس حکام کے مطابق گرفتار ملزم محمد امین کے قبضے سے 25 گرام آئس اور ایک عدد پستول بمعہ ایمونیشن برآمد کیا گیا۔ پولیس نے برآمد ہونے والی منشیات اور اسلحہ تحویل میں لے کر دونوں ملزمان کو مزید قانونی کارروائی کے لیے تھانہ کلایہ منتقل کر دیا ہے۔
پولیس کا کہنا ہے کہ علاقے میں منشیات کے کاروبار اور جرائم پیشہ عناصر کے خلاف کارروائیاں جاری رکھی جائیں گی۔ حکام کے مطابق امن و امان کی صورتحال برقرار رکھنے اور نوجوان نسل کو منشیات کے خطرات سے محفوظ بنانے کے لیے ایسے عناصر کے خلاف قانونی کارروائی عمل میں لائی جا رہی ہے۔
اورکزئی پولیس کی جانب سے شہریوں سے بھی اپیل کی گئی ہے کہ وہ اپنے علاقوں میں مشکوک سرگرمیوں اور منشیات کے کاروبار سے متعلق معلومات پولیس کو فراہم کریں تاکہ جرائم کے خاتمے کے لیے مشترکہ کوششیں کی جا سکیں۔
پولیس کے مطابق دونوں گرفتار ملزمان کے خلاف مزید قانونی کارروائی جاری ہے۔
