مہنگائی پر قابو پانا ہی عوام کو ریلیف دینے کا اصل طریقہ ہے، روزمرہ استعمال کی اشیا کی قیمتوں میں کمی کے لیے مؤثر پالیسیاں بنائی جائیں، نواز شریف

وزیراعظم شہباز شریف نے جاتی امرا میں مسلم لیگ (ن) کے صدر اور سابق وزیراعظم میاں نواز شریف سے اہم ملاقات کی، جس میں ملک کی مجموعی سیاسی اور معاشی صورتحال سمیت عوام کو درپیش معاشی مشکلات اور مہنگائی پر تفصیلی تبادلہ خیال کیا گیا۔ ملاقات کے دوران وزیراعظم شہباز شریف نے نواز شریف کو حکومتی اقدامات، ملکی معیشت کی موجودہ صورتحال اور مختلف شعبوں میں جاری پیش رفت سے آگاہ کیا۔

ملاقات میں پٹرولیم مصنوعات کی قیمتوں میں حالیہ کمی اور اس کے ثمرات عام شہریوں تک پہنچانے کا معاملہ خصوصی طور پر زیر بحث آیا۔ اس موقع پر نواز شریف نے ہدایت کی کہ پٹرولیم مصنوعات کی قیمتوں میں کمی کا براہ راست فائدہ عوام کو ملنا چاہیے اور اس حوالے سے تمام متعلقہ اداروں کو متحرک کیا جائے تاکہ عوام کو حقیقی معنوں میں ریلیف فراہم کیا جا سکے۔

نواز شریف کا کہنا تھا کہ مہنگائی پر قابو پانا ہی عوام کو ریلیف دینے کا اصل طریقہ ہے۔ حکومت ایسی مؤثر پالیسیاں مرتب کرے جن کے نتیجے میں روزمرہ استعمال کی اشیا کی قیمتوں میں کمی آئے اور عام آدمی کی زندگی میں آسانی پیدا ہو۔ انہوں نے اس بات پر زور دیا کہ پٹرولیم مصنوعات کی قیمتوں میں کمی کے اثرات صرف اعلانات تک محدود نہیں رہنے چاہئیں بلکہ اشیائے ضروریہ، ٹرانسپورٹ اور دیگر شعبوں میں بھی اس کے فوائد عوام تک منتقل ہونے چاہئیں۔

سابق وزیراعظم نے کہا کہ عوام کو مہنگائی سے نجات دلانا حکومت کی اولین ترجیحات میں شامل ہونا چاہیے۔ روزمرہ ضروریات زندگی کی اشیا کی قیمتوں میں استحکام برقرار رکھنے کے لیے ایسی حکمت عملی اپنانے کی ضرورت ہے جس سے عام شہریوں کی قوت خرید متاثر نہ ہو اور انہیں معاشی مشکلات سے نکالنے میں مدد ملے۔

نواز شریف نے مزید کہا کہ مسلم لیگ (ن) کا ہمیشہ سے یہ خاصہ رہا ہے کہ ایسی پالیسیاں تشکیل دی جائیں جن کا براہ راست فائدہ عوام تک پہنچے۔ حکومت کو بھی اسی روایت کو برقرار رکھتے ہوئے عوامی فلاح و بہبود اور معاشی بہتری کے لیے عملی اقدامات جاری رکھنے چاہئیں۔

ملاقات میں اس عزم کا اظہار کیا گیا کہ عوام کو زیادہ سے زیادہ معاشی ریلیف فراہم کرنے، مہنگائی میں کمی لانے اور ملکی معیشت کو مستحکم بنانے کے لیے حکومتی کوششوں کو مزید مؤثر بنایا جائے گا۔