ضلع ٹانک میں پولیو ورکرز کے اغوا پر گورنر خیبرپختونخوا کا سخت ردِعمل، مہمند میں 2 پولیس اہلکار شہید

پشاور: خیبر پختونخوا کے اضلاع ٹانک اور مہمند میں انسداد پولیو مہم کے دوران پیش آنے والے دہشت گردی کے واقعات نے سیکیورٹی صورتحال پر تشویش پیدا کر دی ہے۔ ضلع ٹانک سے چار پولیو ورکرز کو اغوا کر لیا گیا، جبکہ ضلع مہمند میں پولیو ٹیم کی حفاظت پر مامور پولیس اہلکاروں پر فائرنگ کے نتیجے میں دو اہلکار شہید اور ایک زخمی ہوگیا۔ گورنر خیبر پختونخوا فیصل کریم کنڈی نے دونوں واقعات کی شدید مذمت کرتے ہوئے مغوی پولیو ورکرز کی فوری اور بحفاظت بازیابی کی ہدایت کی ہے۔

پولیس ذرائع کے مطابق ضلع مہمند میں تھانہ پنڈیالی کی حدود میں واقع علاقے تمانزئی میں انسداد پولیو مہم کے دوران نامعلوم مسلح افراد نے پولیو ٹیم کی سیکیورٹی پر تعینات پولیس اہلکاروں پر اچانک فائرنگ کر دی۔ فائرنگ کے نتیجے میں دو پولیس اہلکار موقع پر شہید جبکہ ایک اہلکار زخمی ہوگیا۔

ڈی پی او مہمند رضا محمد خان کے مطابق واقعے میں شہید ہونے والے پولیس اہلکاروں کی شناخت ظہور اور عربی کے نام سے ہوئی ہے، جبکہ زخمی اہلکار صابر کو طبی امداد فراہم کی گئی۔ ان کا کہنا تھا کہ پولیس کی جوابی کارروائی کے دوران ایک حملہ آور بھی زخمی ہوا۔

واقعے کے فوری بعد علاقے میں سیکیورٹی فورسز اور پولیس کی جانب سے سرچ آپریشن شروع کر دیا گیا تاکہ حملہ آوروں کا سراغ لگایا جا سکے اور علاقے میں امن و امان کی صورتحال برقرار رکھی جا سکے۔

دوسری جانب ضلع ٹانک میں چار پولیو ورکرز کے اغوا کی اطلاع سامنے آنے کے بعد سیکیورٹی اداروں کی توجہ مغویوں کی بازیابی پر مرکوز ہوگئی ہے۔ دونوں واقعات نے انسداد پولیو مہم کے دوران کام کرنے والے عملے اور ان کی حفاظت پر مامور اہلکاروں کو درپیش خطرات کو ایک بار پھر نمایاں کر دیا ہے۔

گورنر خیبر پختونخوا فیصل کریم کنڈی نے ٹانک میں پولیو ورکرز کے اغوا اور مہمند میں پولیس اہلکاروں پر حملے کی شدید الفاظ میں مذمت کرتے ہوئے گہرے دکھ اور تشویش کا اظہار کیا۔ انہوں نے کہا کہ پولیو ورکرز بچوں کے محفوظ مستقبل اور صحت مند پاکستان کے لیے قومی فریضہ انجام دے رہے ہیں، انہیں نشانہ بنانا انسانیت اور قومی مفاد کے خلاف ہے۔

گورنر نے متعلقہ حکام کو ہدایت کی کہ مغوی پولیو ورکرز کی بحفاظت بازیابی کے لیے فوری اور مؤثر اقدامات کیے جائیں اور پولیو ٹیموں کو مکمل سیکیورٹی فراہم کی جائے۔

ادھر گورنر کی مشیر برائے اطلاعات و تعلقات عامہ، ریلیف، بحالی و آبادکاری ثمر ہارون بلور نے بھی دونوں واقعات پر افسوس اور تشویش کا اظہار کرتے ہوئے پولیس اہلکاروں کی شہادت پر دکھ کا اظہار کیا ہے۔