عمران خان کی صحت پر تشویش، اسپتال منتقلی اور اہلخانہ و ڈاکٹروں سے ملاقات کی اجازت کا مطالبہ
اسلام آباد: پاکستان تحریک انصاف (پی ٹی آئی) کے رہنماؤں نے بانی پی ٹی آئی عمران خان کی صحت پر تشویش کا اظہار کرتے ہوئے انہیں اسپتال منتقل کرنے اور اہلخانہ و ڈاکٹروں سے ملاقات کی اجازت دینے کا مطالبہ کردیا۔
وزیراعلیٰ خیبرپختونخوا سہیل آفریدی، چیئرمین پی ٹی آئی بیرسٹر گوہر علی خان اور اسد قیصر نے مشترکہ پریس کانفرنس میں عمران خان کی طبی صورتحال اور ملاقاتوں پر پابندی سے متعلق اپنے تحفظات کا اظہار کیا۔
وزیراعلیٰ خیبرپختونخوا سہیل آفریدی نے کہا کہ عمران خان کو ان کے اہلخانہ سے ملاقات کی اجازت دی جائے اور بہتر طبی سہولیات کی فراہمی کے لیے انہیں اسپتال منتقل کیا جائے۔
ان کا کہنا تھا کہ عمران خان کی آنکھ کا مسئلہ بھی ہے، تاہم اس معاملے پر مناسب توجہ نہیں دی جارہی۔ سہیل آفریدی نے دعویٰ کیا کہ سرکاری رپورٹ میں عمران خان کا بلڈ پریشر زیادہ ہونے کا ذکر بھی موجود ہے اور ان کی صحت جیل میں خراب ہوئی ہے۔
سہیل آفریدی نے کہا کہ یہ میڈیکل رپورٹ حکومت کے اپنے اداروں کی جانب سے تیار کی گئی ہے، اس لیے اسے نظرانداز نہیں کیا جاسکتا۔
’’عمران خان کو عام قیدیوں کے حقوق بھی نہیں مل رہے‘‘
وزیراعلیٰ خیبرپختونخوا نے دعویٰ کیا کہ بانی پی ٹی آئی کو وہ حقوق بھی فراہم نہیں کیے جارہے جو عام قیدیوں کو حاصل ہوتے ہیں۔
انہوں نے مطالبہ کیا کہ عمران خان کو مناسب طبی سہولیات فراہم کی جائیں اور اہلخانہ کو ان سے ملاقات کی اجازت دی جائے۔
سہیل آفریدی کا کہنا تھا کہ وہ اس بات کی ضمانت دینے کو تیار ہیں کہ عمران خان سے ملاقات کرنے والے افراد کسی قسم کی سیاسی گفتگو نہیں کریں گے۔ ان کے مطابق اہلخانہ اور متعلقہ افراد صرف عمران خان کی خیریت دریافت کرنے اور ان کی طبی صورتحال سے آگاہ ہونے کے لیے ملاقات کرنا چاہتے ہیں۔
انہوں نے مزید کہا کہ عمران خان کے کیس کی سماعت کل ہونی ہے اور حکومت کو سیاسی انتقام کے بجائے قانون اور انصاف کے تقاضوں کو مدنظر رکھنا چاہیے۔
بیرسٹر گوہر اور اسد قیصر کا بھی مطالبہ
دوسری جانب چیئرمین پی ٹی آئی بیرسٹر گوہر علی خان نے بھی عمران خان سے ملاقاتوں کا سلسلہ بند ہونے پر تشویش کا اظہار کیا۔
انہوں نے کہا کہ پارٹی کو بانی پی ٹی آئی کی میڈیکل رپورٹ پر تشویش ہے اور مطالبہ کیا کہ انہیں بہتر طبی سہولیات فراہم کرنے کے لیے اسپتال منتقل کیا جائے۔
بیرسٹر گوہر کے مطابق اہلخانہ اور ڈاکٹروں سے ملاقات عمران خان کا حق ہے اور انہیں یہ سہولت فراہم کی جانی چاہیے۔
اسد قیصر نے بھی عمران خان کی صحت سے متعلق سرکاری رپورٹ میں سامنے آنے والے خدشات کو سنجیدگی سے لینے کا مطالبہ کیا۔ ان کا کہنا تھا کہ عمران خان کو فوری طور پر مناسب طبی معائنہ اور علاج کی سہولیات فراہم کی جائیں۔
پی ٹی آئی رہنماؤں کی جانب سے یہ مطالبات ایسے وقت میں سامنے آئے ہیں جب عمران خان کی صحت اور جیل میں طبی سہولیات سے متعلق سیاسی سطح پر ایک بار پھر بحث تیز ہوگئی ہے۔
