مالی سال 2026-27 کے لیے دیت کی رقم ایک کروڑ 93 لاکھ 52 ہزار 390 روپے مقرر
اسلام آباد: وزارت خزانہ نے مالی سال 2026-27 کے لیے دیت کی نئی مالیت کا باضابطہ نوٹیفکیشن جاری کر دیا ہے، جس کے مطابق رواں مالی سال کے لیے دیت کی رقم ایک کروڑ 93 لاکھ 52 ہزار 390 روپے مقرر کی گئی ہے۔ نئی مالیت کا اطلاق پاکستان پینل کوڈ کی متعلقہ دفعات کے تحت کیا جائے گا۔
وزارت خزانہ کی جانب سے جاری کردہ نوٹیفکیشن کے مطابق پاکستان پینل کوڈ کی دفعہ 323 کے تحت دیت کی رقم 30 ہزار 630 گرام چاندی کی موجودہ مارکیٹ قیمت کے مساوی مقرر کی جاتی ہے۔ ہر مالی سال میں چاندی کی قیمتوں میں رد و بدل کو مدنظر رکھتے ہوئے دیت کی نئی مالیت کا تعین کیا جاتا ہے، جس کے بعد وزارت خزانہ اس کا باقاعدہ نوٹیفکیشن جاری کرتی ہے۔
نوٹیفکیشن کے مطابق گزشتہ مالی سال 2025-26 میں دیت کی رقم 98 لاکھ 28 ہزار 670 روپے مقرر کی گئی تھی، جبکہ مالی سال 2026-27 کے لیے اس میں 95 لاکھ 23 ہزار 720 روپے کا نمایاں اضافہ کیا گیا ہے۔ اس طرح دیت کی مجموعی رقم تقریباً دوگنا ہو گئی ہے، جس کی بنیادی وجہ عالمی اور مقامی سطح پر چاندی کی قیمتوں میں ہونے والا نمایاں اضافہ بتایا جا رہا ہے۔
حکام کا کہنا ہے کہ دیت کی مالیت کا تعین اسلامی قوانین اور ملکی قانون کے مطابق مقررہ مقدار میں چاندی کی موجودہ قیمت کی بنیاد پر کیا جاتا ہے۔ اسی اصول کے تحت ہر سال نئی مالیت کا حساب لگایا جاتا ہے تاکہ دیت کی رقم مارکیٹ ویلیو کے مطابق برقرار رہے۔
قانونی ماہرین کے مطابق وزارت خزانہ کا یہ نوٹیفکیشن عدالتوں، انشورنس کمپنیوں اور دیگر متعلقہ اداروں کے لیے اہمیت رکھتا ہے، کیونکہ دیت سے متعلق مقدمات میں اسی مقررہ رقم کو قانونی بنیاد کے طور پر استعمال کیا جاتا ہے۔ حکام نے واضح کیا ہے کہ نئے مالی سال کے دوران تمام متعلقہ ادارے اسی نوٹیفکیشن کے مطابق کارروائی کریں گے۔
