اسٹاک مارکیٹ میں اکاؤنٹ کھولنا مزید آسان، ایس ای سی پی کا نیا ڈیجیٹل فریم ورک متعارف
اسلام آباد: سیکیورٹیز اینڈ ایکسچینج کمیشن آف پاکستان (ایس ای سی پی) نے اسٹاک مارکیٹ میں سرمایہ کاری کو آسان اور تیز بنانے کے لیے نیا ڈیجیٹل آن بورڈنگ فریم ورک متعارف کرا دیا ہے۔
نئے نظام کے تحت سرمایہ کاروں کے لیے اسٹاک مارکیٹ میں اکاؤنٹ کھولنے کا عمل مزید سہل ہوگا۔ ایس ای سی پی کے مطابق سہولت اکاؤنٹ ایک دن میں کھولا جاسکے گا، جبکہ عام انویسٹر اکاؤنٹ کی درخواست پر دو دن کے اندر فیصلہ کیا جائے گا۔
نئے ڈیجیٹل نظام میں درخواست گزاروں کو اپنی درخواست کی پیش رفت سے باخبر رکھنے کے لیے ٹریکنگ آئی ڈی کی سہولت بھی فراہم کی جائے گی۔ سرمایہ کار اس آئی ڈی کے ذریعے اپنی درخواست کا اسٹیٹس آن لائن چیک کرسکیں گے۔
ایس ای سی پی کے مطابق اگر کسی سرمایہ کار کی اکاؤنٹ کھولنے کی درخواست مسترد کی جاتی ہے تو متعلقہ بروکر کو مسترد کیے جانے کی وجوہات تحریری طور پر فراہم کرنا ہوں گی، جس سے عمل میں شفافیت مزید بہتر ہوگی۔
نئے فریم ورک کے تحت پہلے سے تصدیق شدہ سرمایہ کاروں کو دوبارہ تصدیق کے مرحلے سے گزرنے کی ضرورت نہیں ہوگی۔ اس اقدام سے وقت کی بچت کے ساتھ ساتھ اکاؤنٹ کھولنے کے عمل کو مزید تیز بنانے میں مدد ملے گی۔
ایس ای سی پی کے مطابق ڈیجیٹل آن بورڈنگ اور پراسیسنگ کی سہولت 24 گھنٹے، ہفتے کے ساتوں دن دستیاب ہوگی، جس سے ملک بھر میں سرمایہ کار کسی بھی وقت آن لائن درخواست دے سکیں گے۔
ریگولیٹر کا کہنا ہے کہ نئے فریم ورک کا مقصد پاکستان کی کیپیٹل مارکیٹ میں سرمایہ کاروں کی شمولیت بڑھانا اور خاص طور پر نوجوانوں کو سرمایہ کاری کے مواقع تک آسان رسائی فراہم کرنا ہے۔
ایس ای سی پی نے سرمایہ کاروں کی تعداد 25 لاکھ تک بڑھانے کا ہدف مقرر کیا ہے۔ چیئرمین ایس ای سی پی کبیر احمد سدھو کے مطابق نوجوانوں کی اسٹاک مارکیٹ میں شمولیت بڑھانا ترجیحات میں شامل ہے۔
نئے ڈیجیٹل نظام سے امید کی جارہی ہے کہ اسٹاک مارکیٹ میں اکاؤنٹ کھولنے کے روایتی طریقہ کار کی پیچیدگیاں کم ہوں گی اور زیادہ افراد کو باضابطہ سرمایہ کاری کی جانب راغب کرنے میں مدد ملے گی۔
#اسٹاک_مارکیٹ #ایس_ای_سی_پی #سرمایہ_کاری #ڈیجیٹل_آن_بورڈنگ #پاکستان_اسٹاک_مارکیٹ #معیشت #نوجوان #فنانس
