خیبرپختونخوا میں خواتین کے لیے ای وی بائیکس اسکیم، ای وی رکشوں کا منصوبہ بھی لانے کا اعلان
پشاور: وزیراعلیٰ خیبرپختونخوا سہیل آفریدی نے صوبے میں خواتین کے لیے الیکٹرک بائیکس اسکیم شروع کرنے کا اعلان کرتے ہوئے کہا ہے کہ طالبات اور ملازمت پیشہ خواتین کو میرٹ کی بنیاد پر ای وی بائیکس فراہم کی جائیں گی۔
57ویں صوبائی کابینہ اجلاس سے خطاب کرتے ہوئے وزیراعلیٰ نے بتایا کہ ای وی بائیکس اسکیم کا پہلا مرحلہ جلد شروع کیا جائے گا، جس کے تحت اہل طالبات اور ملازمت پیشہ خواتین کو الیکٹرک بائیکس فراہم کی جائیں گی۔
سہیل آفریدی نے کہا کہ حکومت کی جانب سے خواتین کو جدید اور ماحول دوست سفری سہولت فراہم کرنے کے لیے یہ اہم اقدام اٹھایا جا رہا ہے۔ ان کے مطابق اسکیم میں میرٹ کو بنیادی ترجیح دی جائے گی تاکہ مستحق اور اہل خواتین اس سہولت سے فائدہ اٹھا سکیں۔
وزیراعلیٰ نے اعلان کیا کہ الیکٹرک بائیکس کے بعد صوبے میں ای وی رکشوں کی اسکیم بھی متعارف کرائی جائے گی۔ ان کا کہنا تھا کہ الیکٹرک گاڑیوں کے فروغ سے نہ صرف شہریوں کو متبادل سفری سہولیات میسر آئیں گی بلکہ صاف اور سرسبز ماحول کے فروغ میں بھی مدد ملے گی۔
اجلاس کے دوران وزیراعلیٰ نے صوبے کے ڈویژنل ہیڈکوارٹرز میں الیکٹرک بسز اسکیم پر کام مزید تیز کرنے کی ہدایت بھی کی۔ انہوں نے کہا کہ عوام کو جدید، آرام دہ اور ماحول دوست سفری سہولیات کی فراہمی صوبائی حکومت کی ترجیحات میں شامل ہے۔
حکومت کی جانب سے الیکٹرک بائیکس، رکشوں اور بسوں کے منصوبوں کو صوبے میں ماحول دوست ٹرانسپورٹ کے فروغ کی جانب اہم قدم قرار دیا جا رہا ہے۔ ان منصوبوں سے پبلک ٹرانسپورٹ کے نظام کو جدید بنانے کے ساتھ ساتھ روایتی ایندھن پر انحصار کم کرنے میں بھی مدد ملنے کی توقع ہے۔
خواتین کے لیے ای وی بائیکس اسکیم کا آغاز خاص طور پر طالبات اور ملازمت پیشہ خواتین کے لیے سفری مشکلات کم کرنے اور انہیں زیادہ خودمختار سفری سہولت فراہم کرنے کی کوشش کے طور پر دیکھا جا رہا ہے۔
