خیبر میں تجاوزات اور بغیر رجسٹریشن موٹر سائیکلوں کے خلاف پولیس کا کریک ڈاؤن جاری
خیبر: ضلع خیبر میں امن و امان برقرار رکھنے، عارضی تجاوزات کے خاتمے اور بغیر رجسٹریشن موٹر سائیکلوں کے خلاف پولیس کا کریک ڈاؤن جاری ہے۔
ڈسٹرکٹ پولیس آفیسر وقار احمد کی خصوصی ہدایات پر ضلع بھر میں پولیس اہلکاروں کو کارروائیاں تیز کرنے اور قانون کی خلاف ورزی کرنے والوں کے خلاف ضابطے کے مطابق اقدامات کرنے کی ہدایت کی گئی ہے۔
پولیس حکام کے مطابق عارضی تجاوزات کے خاتمے کا مقصد ٹریفک کی روانی بہتر بنانا اور شہریوں کو آمدورفت میں درپیش مشکلات کم کرنا ہے۔ اسی طرح بغیر رجسٹریشن موٹر سائیکلوں کے خلاف کارروائیوں کے ذریعے قانون کی عمل داری یقینی بنانے پر توجہ دی جا رہی ہے۔
ڈی پی او وقار احمد نے کہا ہے کہ امن و امان کا قیام اور شہریوں کے جان و مال کا تحفظ خیبر پولیس کی اولین ترجیحات میں شامل ہیں۔ انہوں نے واضح کیا کہ قانون پر عمل درآمد یقینی بنانے اور عوام کو بہتر ماحول فراہم کرنے کے لیے کارروائیاں بلاامتیاز جاری رہیں گی۔
پولیس نے متعلقہ اہلکاروں کو ہدایت کی ہے کہ جاری اقدامات پر مؤثر انداز میں عمل درآمد یقینی بنایا جائے تاکہ ضلع میں امن و امان کی صورتحال بہتر رکھنے کے ساتھ ٹریفک کی روانی بھی برقرار رکھی جا سکے۔
