پاکستانی فری لانسرز نے نیا ریکارڈ بنا دیا، ستمبر میں 197 ملین ڈالر زرمبادلہ کما لیا
پاکستانی فری لانسرز نے ڈیجیٹل معیشت میں اہم سنگِ میل عبور کرتے ہوئے ستمبر 2026 میں ملکی تاریخ کی بلند ترین ماہانہ برآمدی آمدن حاصل کرلی۔
سرکاری اعداد و شمار کے مطابق ستمبر میں پاکستانی فری لانسرز کی برآمدی آمدن 197 ملین ڈالر رہی، جو سالانہ بنیاد پر 49 فیصد جبکہ اگست کے مقابلے میں 11 فیصد زیادہ ہے۔
اعداد و شمار کے مطابق مالی سال 2026-27 کی پہلی سہ ماہی، یعنی جولائی سے ستمبر 2026 کے دوران، فری لانسرز نے مجموعی طور پر 550 ملین ڈالر کا زرمبادلہ کمایا۔ اس طرح گزشتہ مالی سال کی اسی مدت کے مقابلے میں برآمدی آمدن میں 46 فیصد اضافہ ریکارڈ کیا گیا۔
پاکستانی فری لانسرز کی آمدن میں یہ اضافہ عالمی ڈیجیٹل مارکیٹ میں پاکستانی ہنرمندوں کی بڑھتی ہوئی شرکت اور آن لائن خدمات کی برآمدات میں توسیع کی عکاسی کرتا ہے۔ سافٹ ویئر ڈیولپمنٹ، گرافک ڈیزائننگ، ڈیجیٹل مارکیٹنگ، ویڈیو ایڈیٹنگ اور دیگر آن لائن خدمات سے وابستہ افراد ملکی معیشت کے لیے زرمبادلہ حاصل کرنے میں اہم کردار ادا کر رہے ہیں۔
سرکاری اعداد و شمار کے مطابق مالی سال 2025-26 کے دوران بھی پاکستانی فری لانسرز نے ریکارڈ 1.76 ارب ڈالر کا زرمبادلہ کمایا تھا۔
تازہ اعداد و شمار کے مطابق فری لانسنگ کے شعبے میں مسلسل اضافہ پاکستان کی ڈیجیٹل معیشت کے لیے ایک اہم پیش رفت ہے۔ تاہم اس رفتار کو برقرار رکھنے کے لیے ڈیجیٹل مہارتوں کے فروغ، انٹرنیٹ کی بہتر سہولیات اور عالمی آن لائن مارکیٹوں تک رسائی کو مزید بہتر بنانا اہم ہوگا۔
