سری لنکا نے پی سی بی پیٹرنز الیون کے خلاف پہلی اننگز 223 رنز پر ڈکلیئر کر دی
اسلام آباد: پاکستان اور سری لنکا کے درمیان کھیلے جانے والے تین روزہ پریکٹس میچ میں مہمان ٹیم نے اپنی پہلی اننگز 7 وکٹوں کے نقصان پر 223 رنز بنا کر ڈکلیئر کر دی۔
اسلام آباد کلب میں جاری اس پریکٹس میچ میں سری لنکن بیٹرز نے محتاط انداز میں بیٹنگ کرتے ہوئے مجموعی اسکور 223 رنز تک پہنچایا۔ مہمان ٹیم کی جانب سے لہیرو اودارا اور کوشل مینڈس نے نمایاں بیٹنگ کا مظاہرہ کیا۔ لہیرو اودارا نے 65 جبکہ کوشل مینڈس نے 66 رنز بنائے۔
پاکستان کی جانب سے بولرز نے وکٹیں حاصل کرنے کے لیے کوششیں جاری رکھیں۔ علی شبیر، محمد سلمان اور ساقب خان نے دو، دو کھلاڑیوں کو آؤٹ کیا، جبکہ عبید شاہ نے ایک وکٹ حاصل کی۔
پی سی بی پیٹرنز الیون کی قیادت سعد بیگ کر رہے ہیں، جبکہ ٹیم میں قومی ٹیسٹ اسکواڈ کے کئی کھلاڑی بھی شامل ہیں۔ تین روزہ میچ کا مقصد پاکستانی کھلاڑیوں کو طویل فارمیٹ کی کرکٹ میں تیاری کا موقع فراہم کرنا اور سری لنکن ٹیم کو مقامی کنڈیشنز سے ہم آہنگ کرنا ہے۔
یہ پریکٹس میچ پاکستان اور سری لنکا کے درمیان شیڈول دو ٹیسٹ میچوں کی سیریز سے قبل کھیلا جا رہا ہے۔ پہلا ٹیسٹ 9 نومبر سے راولپنڈی میں جبکہ دوسرا ٹیسٹ 17 نومبر سے لاہور میں شروع ہوگا۔
تین روزہ میچ 6 نومبر تک جاری رہے گا، جس کے بعد قومی سلیکشن کمیٹی پیٹرنز الیون میں شامل فاسٹ بولرز کی کارکردگی کا جائزہ لے کر دو اضافی فاسٹ بولرز کو ٹیسٹ اسکواڈ میں شامل کرے گی۔
