ضلع خیبر: باڑہ میں ونگ کمانڈر اور قمر خیل قبیلے کے مشران کا جرگہ، دیرینہ اراضی تنازع حل کرنے کی پیشکش
شکندو درہ میں آفریدی قمر خیل اور اورکزئی ستوری خیل قبائل کے درمیان اراضی تنازع پر گفتگو، دونوں قبائل کے درمیان جرگہ کرانے پر اتفاق
ضلع خیبر کی تحصیل باڑہ میں مقامی ونگ کمانڈر اور قمر خیل قبیلے کے مشران پر مشتمل اہم جرگہ منعقد ہوا، جس میں علاقے کی مجموعی صورتحال، باہمی امور اور مقامی آبادی کو درپیش مسائل پر تفصیلی تبادلہ خیال کیا گیا۔ جرگے میں علاقے میں امن و امان برقرار رکھنے، قبائلی روابط مضبوط بنانے اور مقامی تنازعات کو باہمی مشاورت کے ذریعے حل کرنے کی اہمیت پر زور دیا گیا۔
جرگے کے دوران شکندو درہ میں آفریدی قمر خیل اور اورکزئی ستوری خیل قبائل کے درمیان دیرینہ اراضی تنازع کا معاملہ خصوصی طور پر زیر بحث آیا۔ اس تنازع کے باعث دونوں قبائل کے درمیان کشیدگی کے خدشات کے پیش نظر جرگے کے شرکاء نے اس مسئلے کا پرامن اور متفقہ حل تلاش کرنے کی ضرورت پر اتفاق کیا۔
اس موقع پر قمر خیل قبیلے کے مشران نے دونوں قبائل کے درمیان باقاعدہ جرگہ منعقد کرانے کی پیشکش کی تاکہ فریقین کو ایک جگہ بٹھا کر ان کے مؤقف سنے جاسکیں اور باہمی مشاورت سے تنازع کے حل کی راہ ہموار کی جاسکے۔ مشران کا کہنا تھا کہ قبائلی روایات کے مطابق جرگے کا نظام تنازعات کے حل میں اہم کردار ادا کرسکتا ہے اور اس کے ذریعے فریقین کے درمیان اختلافات کو کم کرنے میں مدد مل سکتی ہے۔
جرگے میں اس بات پر بھی زور دیا گیا کہ شکندو درہ کے اراضی تنازع کو مزید پیچیدہ ہونے سے بچانے کے لیے بروقت اقدامات ضروری ہیں۔ فریقین کے درمیان مذاکرات اور اتفاق رائے کی کوششوں کو آگے بڑھانا وقت کی اہم ضرورت ہے تاکہ کسی بھی ممکنہ جانی و مالی نقصان سے بچا جاسکے۔
مقامی ونگ کمانڈر نے بھی علاقے میں امن و استحکام کے لیے مقامی مشران کے کردار اور تعاون کی اہمیت کو اجاگر کیا۔ جرگے کے شرکاء نے اس عزم کا اظہار کیا کہ علاقے کے مسائل کے حل کے لیے مشاورت اور رابطوں کا سلسلہ جاری رکھا جائے گا۔
مقامی مشران نے اس بات پر زور دیا کہ قبائلی علاقوں میں دیرپا امن کے قیام کے لیے باہمی اعتماد، برداشت اور اجتماعی کوششیں ناگزیر ہیں۔ جرگے کو علاقے میں امن و امان کے فروغ اور دیرینہ قبائلی تنازعات کے پرامن حل کی جانب ایک اہم پیش رفت قرار دیا جا رہا ہے۔
