گورنر فیصل کریم کنڈی کی وفاقی وزیر ریلوے حنیف عباسی سے ملاقات، لنڈی کوتل ٹورسٹ ٹرین کی بحالی پر غور
اسلام آباد: گورنر خیبرپختونخوا فیصل کریم کنڈی نے وفاقی وزیر ریلوے حنیف عباسی سے ملاقات کی، جس میں صوبے میں ریلوے نظام کو جدید تقاضوں اور عوامی ضروریات سے ہم آہنگ بنانے سمیت مختلف امور پر تبادلہ خیال کیا گیا۔
ملاقات میں خیبرپختونخوا میں ریلوے کی سہولیات بہتر بنانے، مسافروں کو زیادہ سے زیادہ سفری سہولتیں فراہم کرنے اور ریلوے سروسز کے معیار کو بہتر بنانے کے لیے مختلف تجاویز کا جائزہ لیا گیا۔
اس موقع پر لنڈی کوتل ٹورسٹ ٹرین کی بحالی کا معاملہ بھی خصوصی طور پر زیر بحث آیا۔ دونوں رہنماؤں نے اس منصوبے کی اہمیت پر تبادلہ خیال کرتے ہوئے علاقے میں سیاحت کے فروغ اور مقامی معیشت کو مضبوط بنانے کے امکانات کا جائزہ لیا۔
گورنر فیصل کریم کنڈی نے کہا کہ خیبرپختونخوا میں ریلوے کا نظام بہتر بنانے سے عوام کو محفوظ اور آسان سفری سہولیات میسر آئیں گی، جبکہ صوبے میں تجارتی سرگرمیوں کو بھی فروغ ملے گا۔ انہوں نے کہا کہ لنڈی کوتل ٹورسٹ ٹرین کی بحالی علاقے کی سیاحتی ترقی کے لیے اہم سنگ میل ثابت ہو سکتی ہے۔
ان کا کہنا تھا کہ خیبرپختونخوا قدرتی حسن، تاریخی مقامات اور سیاحتی وسائل سے مالا مال صوبہ ہے، جہاں سیاحت کے فروغ کے لیے بہتر سفری سہولیات کی فراہمی انتہائی ضروری ہے۔ لنڈی کوتل ٹورسٹ ٹرین کی بحالی سے نہ صرف ملکی سیاحوں کو ایک منفرد سفری تجربہ میسر آئے گا بلکہ مقامی آبادی کے لیے معاشی سرگرمیوں کے نئے مواقع بھی پیدا ہو سکتے ہیں۔
ملاقات کے دوران صوبے کی مجموعی سیاسی صورتحال، ترقیاتی امور اور عوامی مسائل کے حل کے لیے وفاقی و صوبائی حکومتوں کے درمیان مؤثر رابطوں کی ضرورت پر بھی گفتگو ہوئی۔
گورنر فیصل کریم کنڈی نے زور دیا کہ خیبرپختونخوا کی ترقی اور پسماندہ علاقوں کو قومی ترقی کے دھارے میں شامل کرنے کے لیے وفاقی حکومت اور متعلقہ اداروں کے درمیان تعاون کو مزید مضبوط بنایا جائے۔
ملاقات میں خیبرپختونخوا میں ریلوے کی بہتری، لنڈی کوتل ٹورسٹ ٹرین کی بحالی، سیاحتی سہولیات کے فروغ اور عوامی مسائل کے حل کے لیے مشترکہ کوششیں جاری رکھنے کی ضرورت پر اتفاق کیا گیا۔
