نوجوانوں کو معیاری تعلیم اور آگے بڑھنے کے مواقع فراہم کرنا ہماری ذمہ داری ہے، نائب وزیراعظم
اسلام آباد: نائب وزیراعظم اور وزیر خارجہ نے کہا ہے کہ نوجوان علامہ محمد اقبالؒ کی امیدوں کا محور تھے، نوجوانوں کو معیاری تعلیم، جدید ہنر اور ترقی کے یکساں مواقع فراہم کرنا ریاست کی بنیادی ذمہ داری ہے۔ ملکی تعمیر و ترقی میں نوجوان علم، تخلیقی سوچ اور خدمتِ خلق کے جذبے کے ذریعے مؤثر کردار ادا کر سکتے ہیں۔
یومِ اقبال کے موقع پر اپنے پیغام میں نائب وزیراعظم و وزیر خارجہ نے کہا کہ علامہ اقبالؒ نے نوجوان نسل کو مسلسل جدوجہد، بلند نگاہی اور اپنے مقصد سے مضبوط وابستگی کا درس دیا۔ ان کی فکر نوجوانوں کو خود اعتمادی، محنت اور زندگی میں بلند اہداف حاصل کرنے کی ترغیب دیتی ہے۔
انہوں نے کہا کہ نوجوانوں کی صلاحیتوں کو بروئے کار لائے بغیر قومی ترقی کا خواب پورا نہیں کیا جا سکتا۔ حکومت اور متعلقہ اداروں کی ذمہ داری ہے کہ نوجوانوں کو تعلیم، ہنر مندی اور روزگار کے بہتر مواقع فراہم کریں تاکہ وہ اپنی صلاحیتوں کو ملک و قوم کی بہتری کے لیے استعمال کر سکیں۔
نائب وزیراعظم نے کہا کہ اخوت، انسانی وقار اور باہمی احترام علامہ اقبالؒ کی فکر کے بنیادی اصول ہیں۔ ان اصولوں کو معاشرتی زندگی کے ساتھ قومی پالیسیوں اور عملی اقدامات کا بھی حصہ بنانا ضروری ہے۔
ان کا کہنا تھا کہ پاکستان عالمی سطح پر امن، انصاف اور باہمی احترام کے فروغ کے لیے اپنا کردار ادا کرتا رہے گا۔ پاکستان تمام اقوام کی خودمختاری اور عوام کے حقِ خودارادیت کی حمایت جاری رکھے گا، جبکہ تنازعات کے پُرامن حل کی حمایت بھی ملکی خارجہ پالیسی کا اہم حصہ ہے۔
انہوں نے مزید کہا کہ فکرِ اقبال محض تقاریر اور تقریبات تک محدود نہیں رہنی چاہیے بلکہ قومی فیصلوں اور عملی اقدامات میں بھی اس کی جھلک نظر آنی چاہیے۔ علامہ اقبالؒ کے نظریات پر عمل کرتے ہوئے ایک ایسا معاشرہ تشکیل دیا جا سکتا ہے جہاں انصاف، مساوات اور انسانی وقار کو بنیادی اہمیت حاصل ہو۔
نائب وزیراعظم کے مطابق پاکستان کو علم و عمل میں آگے اور معاشی اعتبار سے مضبوط بنانے کا عزم قومی ترجیحات میں شامل ہے۔ ملک کو ایسا خوشحال اور ترقی یافتہ معاشرہ بنانا ہوگا جہاں ہر شہری کو انصاف اور یکساں مواقع میسر ہوں۔
انہوں نے کہا کہ قانون کی حکمرانی، معاشی استحکام اور مساوی مواقع کی فراہمی کے ذریعے ہی ایک مضبوط پاکستان کی بنیاد رکھی جا سکتی ہے۔ فکرِ اقبال پر حقیقی معنوں میں عمل پیرا ہو کر ترقی یافتہ، خوشحال اور مستحکم پاکستان کی تعمیر ممکن ہے۔
