اداکارہ میرا کی چھوٹی بہن شائستہ عباس لندن میں انتقال کرگئیں، طویل عرصے سے کینسر میں مبتلا تھیں

لندن: پاکستانی معروف اداکارہ میرا کی چھوٹی بہن شائستہ عباس طویل عرصے تک کینسر کے مرض سے جنگ لڑنے کے بعد لندن کے ایک اسپتال میں انتقال کرگئیں۔ ان کے انتقال کی تصدیق اداکارہ میرا نے ایک نجی ٹی وی سے گفتگو کرتے ہوئے کی۔

اداکارہ میرا نے نیویارک میں گفتگو کے دوران بتایا کہ ان کی بہن شائستہ عباس کئی برس سے کینسر کے مرض میں مبتلا تھیں اور گزشتہ کچھ عرصے سے ان کی طبیعت مسلسل خراب ہو رہی تھی۔ بیماری کے باعث انہیں مختلف اوقات میں طبی امداد کی ضرورت پڑتی رہی، تاہم ان کی صحت میں مستقل بہتری نہ آسکی۔

میرا نے بہن کے انتقال پر گہرے دکھ اور افسوس کا اظہار کرتے ہوئے بتایا کہ شائستہ کی بگڑتی ہوئی صحت کے پیش نظر انہوں نے ان سے ملاقات اور آخری وقت میں ساتھ رہنے کے لیے متعدد بار برطانوی ہائی کمیشن سے ویزے کی درخواست کی تھی۔ ان کے مطابق انہوں نے انسانی ہمدردی کی بنیاد پر ویزا جاری کرنے کی اپیل بھی کی، تاہم انہیں ویزا فراہم نہیں کیا گیا۔

دوسری جانب اداکارہ میرا اور شائستہ عباس کی بہن اقصیٰ عباس نے بتایا کہ شائستہ گزشتہ دو ماہ سے لندن کے ایک اسپتال میں زیر علاج تھیں۔ اس سے قبل بھی ان کی طبیعت خراب ہونے پر انہیں کئی مرتبہ اسپتال منتقل کیا گیا، جہاں علاج کے بعد عارضی بہتری آنے پر گھر بھیج دیا جاتا تھا۔

اقصیٰ عباس کے مطابق شائستہ کی صحت گزشتہ کچھ عرصے سے مسلسل خراب تھی اور وہ کینسر کے خلاف طویل عرصے سے جدوجہد کر رہی تھیں۔ بالآخر وہ لندن کے اسپتال میں زندگی کی بازی ہار گئیں۔

شائستہ عباس ایک کمسن بیٹی کی والدہ تھیں۔ ان کے انتقال کے بعد خاندان کو ایک بڑے صدمے کا سامنا ہے۔ اداکارہ میرا نے اپنی بہن کی کمسن بیٹی کی کفالت اور پرورش کی ذمہ داری اٹھانے کا فیصلہ کیا ہے اور بھانجی کو گود لینے کا ارادہ ظاہر کیا ہے۔

خاندانی ذرائع کے مطابق شائستہ عباس کی تدفین لندن میں کی جائے گی۔ ان کے انتقال کی خبر سامنے آنے کے بعد شوبز حلقوں اور مداحوں کی جانب سے اداکارہ میرا اور ان کے اہل خانہ سے تعزیت اور ہمدردی کا اظہار کیا جا رہا ہے۔