شاہ محمود قریشی کی طبیعت ناساز، پنجاب انسٹی ٹیوٹ آف کارڈیالوجی منتقل
کوٹ لکھپت جیل میں چہل قدمی کے دوران چکر آنے سے گر کر زخمی ہوگئے تھے، مختلف طبی ٹیسٹوں کے لیے اسپتال منتقل کیا گیا، ذرائع
لاہور: پاکستان تحریک انصاف کے سینئر رہنما اور سابق وزیر خارجہ شاہ محمود قریشی کو طبیعت ناساز ہونے پر کوٹ لکھپت جیل سے پنجاب انسٹی ٹیوٹ آف کارڈیالوجی منتقل کردیا گیا ہے، جہاں ان کے مختلف طبی ٹیسٹ کیے جائیں گے۔
ذرائع کے مطابق شاہ محمود قریشی کو گزشتہ چند روز سے طبیعت کی خرابی کا سامنا تھا، جس کے بعد جیل حکام نے انہیں طبی معائنے اور ضروری ٹیسٹوں کے لیے اسپتال منتقل کرنے کا انتظام کیا۔ ذرائع کا کہنا ہے کہ ان کی طبیعت جیل میں پیش آنے والے ایک واقعے کے بعد خراب ہوئی تھی، جس کے باعث انہیں طبی امداد کی ضرورت پیش آئی۔
اطلاعات کے مطابق شاہ محمود قریشی چند روز قبل کوٹ لکھپت جیل میں اپنی بیرک کے اندر چہل قدمی کر رہے تھے کہ اچانک انہیں چکر آگئے اور وہ زمین پر گر پڑے۔ اس دوران انہیں جسم کے مختلف حصوں پر چوٹیں آئیں، جن میں گھٹنے اور بازو کی چوٹیں بھی شامل تھیں۔
واقعے کے بعد جیل حکام نے فوری طور پر ان کی صحت سے متعلق اقدامات کیے تھے۔ ذرائع کے مطابق جیل حکام نے شاہ محمود قریشی کے خون کے نمونے حاصل کرکے شوکت خانم اسپتال بھجوائے تھے تاکہ ان کے ضروری طبی ٹیسٹ مکمل کیے جاسکیں اور صحت کی صورتحال کا جائزہ لیا جاسکے۔
اب انہیں پنجاب انسٹی ٹیوٹ آف کارڈیالوجی منتقل کیا گیا ہے، جہاں ڈاکٹروں کی نگرانی میں ان کے مختلف ٹیسٹ اور طبی معائنہ کیا جائے گا۔ اسپتال منتقلی کا مقصد ان کی طبیعت کی خرابی کی وجوہات جاننا اور صحت کی مجموعی صورتحال کا جائزہ لینا بتایا جارہا ہے۔
شاہ محمود قریشی کی اسپتال منتقلی کی خبر سامنے آنے کے بعد سیاسی حلقوں میں بھی ان کی صحت سے متعلق تشویش پائی جارہی ہے۔ تاہم ان کی موجودہ طبی کیفیت، ٹیسٹوں کے نتائج اور مزید علاج سے متعلق تاحال کوئی باضابطہ تفصیلات سامنے نہیں آئی ہیں۔
واضح رہے کہ شاہ محمود قریشی اس وقت کوٹ لکھپت جیل میں قید ہیں۔ ان کی صحت اور طبی سہولیات سے متعلق مزید معلومات کا انتظار کیا جارہا ہے۔
