شہداء ہمارا فخر ہیں، مولانا فضل الرحمان قوم اور شہداء کے ورثاء سے معافی مانگیں، گورنر خیبرپختونخوا
پشاور: گورنر خیبرپختونخوا فیصل کریم کنڈی نے جمعیت علمائے اسلام (ف) کے سربراہ مولانا فضل الرحمان کے شہداء سے متعلق بیان پر ردعمل دیتے ہوئے کہا ہے کہ شہداء پوری قوم کا فخر ہیں اور مولانا فضل الرحمان کو اپنے بیان پر قوم اور شہداء کے ورثاء سے معافی مانگنی چاہیے۔
فیصل کریم کنڈی نے کہا کہ سیکیورٹی فورسز کے شہداء نے مساجد، امام بارگاہوں، مدارس، سرحدوں اور ملک کے امن و استحکام کے لیے بے مثال قربانیاں دی ہیں۔ انہوں نے کہا کہ فوج، ایف سی اور پولیس کے جوانوں کی قربانیوں کی بدولت ملک میں امن قائم ہے اور عوام محفوظ زندگی گزار رہے ہیں۔
گورنر خیبرپختونخوا کا کہنا تھا کہ شہداء سے متعلق مولانا فضل الرحمان کا بیان افسوسناک ہے اور ایسے بیانات سے گریز کیا جانا چاہیے جو قومی اتحاد اور یکجہتی کو متاثر کریں۔
انہوں نے کہا کہ پاکستان دہشت گردی کے خلاف جنگ لڑ رہا ہے اور اس نازک صورتحال میں تمام سیاسی قیادت کو ذمہ دارانہ طرزِ عمل اختیار کرنا چاہیے۔
فیصل کریم کنڈی نے مطالبہ کیا کہ مولانا فضل الرحمان اپنے بیان کی وضاحت کریں اور قوم سمیت شہداء کے خاندانوں سے معذرت کریں۔
نوٹ: اس معاملے پر مولانا فضل الرحمان یا جمعیت علمائے اسلام (ف) کی جانب سے اس بیان پر باضابطہ ردعمل سامنے نہیں آیا۔
