اقوام متحدہ کی سلامتی کونسل کی سوات کے کبل خودکش حملے کی شدید مذمت، پاکستان سے مکمل اظہارِ یکجہتی
نیویارک: اقوام متحدہ کی سلامتی کونسل کے اراکین نے خیبرپختونخوا کے ضلع سوات کے علاقے کبل میں پولیس اسٹیشن کے باہر ہونے والے خودکش حملے کی شدید الفاظ میں مذمت کرتے ہوئے دہشت گردی کو عالمی امن اور سلامتی کے لیے سنگین خطرہ قرار دیا ہے۔ سلامتی کونسل نے حملے میں جاں بحق ہونے والے افراد کے اہلِ خانہ، حکومتِ پاکستان اور پاکستانی عوام سے دلی ہمدردی اور تعزیت کا اظہار کیا ہے۔
سلامتی کونسل کے ترجمان کی جانب سے جاری بیان کے مطابق 2 اگست کو ہونے والے اس خودکش حملے میں کم از کم 16 پاکستانی شہری جان کی بازی ہار گئے جبکہ متعدد افراد زخمی ہوئے۔ بیان میں زخمیوں کی جلد اور مکمل صحت یابی کے لیے نیک خواہشات کا اظہار بھی کیا گیا۔
اقوام متحدہ کے مطابق کالعدم تحریک طالبان پاکستان (ٹی ٹی پی) نے اس حملے کی ذمہ داری قبول کی ہے۔ سلامتی کونسل کے اراکین نے اس واقعے کو نہایت افسوسناک قرار دیتے ہوئے واضح کیا کہ دہشت گردی کی ہر شکل اور ہر مظہر ناقابلِ قبول ہے، چاہے اس کے محرکات یا مقاصد کچھ بھی ہوں۔
بیان میں کہا گیا کہ دہشت گردی بین الاقوامی امن اور سلامتی کے لیے سب سے بڑے خطرات میں سے ایک ہے، اس لیے ضروری ہے کہ اس قسم کی کارروائیوں میں ملوث عناصر، ان کے منصوبہ ساز، مالی معاونین اور سہولت کاروں کو قانون کے مطابق انصاف کے کٹہرے میں لایا جائے۔ سلامتی کونسل نے اس بات پر بھی زور دیا کہ دہشت گردی کے خلاف عالمی سطح پر مؤثر تعاون ناگزیر ہے۔
سلامتی کونسل کے اراکین نے تمام رکن ممالک پر زور دیا کہ وہ اقوام متحدہ کے چارٹر، بین الاقوامی قوانین اور سلامتی کونسل کی متعلقہ قراردادوں کے مطابق اپنی ذمہ داریاں پوری کرتے ہوئے حکومتِ پاکستان کے ساتھ مکمل تعاون کریں تاکہ دہشت گردی کے نیٹ ورکس کا خاتمہ ممکن بنایا جا سکے۔
بیان میں اس عزم کا اعادہ کیا گیا کہ عالمی برادری دہشت گردی کے خلاف پاکستان کی کوششوں کی حمایت جاری رکھے گی اور ایسے واقعات کی روک تھام کے لیے بین الاقوامی تعاون کو مزید مضبوط بنایا جائے گا۔ سلامتی کونسل نے اس بات پر بھی زور دیا کہ دہشت گردی کے خلاف جنگ میں مشترکہ حکمت عملی، معلومات کے تبادلے اور قانون نافذ کرنے والے اداروں کے درمیان تعاون انتہائی ضروری ہے تاکہ مستقبل میں ایسے افسوسناک واقعات کا سدباب کیا جا سکے اور خطے میں پائیدار امن و استحکام کو فروغ ملے۔
