عالمی کرنسیوں کی قدر میں اتار چڑھاؤ، ڈالر مستحکم، ین اور نیوزی لینڈ ڈالر کمزور
عالمی مالیاتی منڈیوں میں نئے کاروباری ہفتے کا آغاز بڑی کرنسیوں کی قدر میں معمولی اتار چڑھاؤ کے ساتھ ہوا ہے، جبکہ سرمایہ کاروں کی توجہ امریکی وسط مدتی انتخابات، اہم معاشی اعدادوشمار اور مختلف ممالک کے مرکزی بینکوں کے شرح سود سے متعلق فیصلوں پر مرکوز ہے۔
ایشیائی کاروباری سیشن کے دوران یورو کی قدر 1.1159 ڈالر ریکارڈ کی گئی، جو گزشتہ 17 ماہ کی کم ترین سطح کے قریب ہے۔ فرانس کی کریڈٹ آؤٹ لک ریٹنگ مستحکم سے منفی کرنے کے بعد یورو دباؤ کا شکار رہا۔
برطانوی پاؤنڈ 1.3387 ڈالر پر برقرار رہا، جبکہ ڈالر انڈیکس 101.94 کی سطح پر مستحکم ریکارڈ کیا گیا۔ دوسری جانب جاپانی ین کی قدر میں 0.15 فیصد کمی ہوئی اور یہ 157.78 ین فی ڈالر پر آگیا۔ آسٹریلوی ڈالر 0.7033 ڈالر پر مستحکم رہا، جبکہ نیوزی لینڈ کے ڈالر میں 0.11 فیصد کمی کے بعد قدر 0.5625 ڈالر ہوگئی۔
آسٹریلیا میں شرح سود بڑھنے کا امکان
سرمایہ کاروں کی نظریں ریزرو بینک آف آسٹریلیا کے فیصلے پر بھی ہیں۔ مارکیٹ میں توقع کی جا رہی ہے کہ مرکزی بینک منگل کو شرح سود بڑھا کر 4.85 فیصد کر سکتا ہے، جو تقریباً دو دہائیوں کی بلند ترین سطح ہوگی۔
کرپٹو مارکیٹ میں بھی اتار چڑھاؤ
بائنانس پر مبینہ 6.3 ارب ڈالر کی ہیکنگ کے بعد کرپٹو مارکیٹ دباؤ کا شکار رہی۔ بٹ کوائن گزشتہ ہفتے چھ ہفتوں کی کم ترین سطح تک پہنچا، جبکہ ایتھر بھی دو ماہ کی کم ترین سطح پر آگیا تھا۔ تاہم نئے کاروباری ہفتے کے آغاز پر دونوں کرنسیوں میں معمولی بہتری دیکھی گئی۔ بٹ کوائن 0.22 فیصد اضافے کے ساتھ 77 ہزار 975 ڈالر جبکہ ایتھر 0.27 فیصد اضافے کے بعد 2 ہزار 268 ڈالر پر پہنچ گیا۔
بائنانس کے مطابق چوری ہونے والے اثاثوں میں سے 95 فیصد کا انتظام کر لیا گیا ہے، جبکہ ہیکنگ کے بعد صارفین نے ایکسچینج سے 3.64 ارب ڈالر نکلوائے۔ ایف بی آئی نے سائبر حملے میں شمالی کوریا سے تعلق رکھنے والے ہیکرز کے ملوث ہونے کا دعویٰ کیا ہے۔
امریکی انتخابات اور عالمی منڈیوں کی نظریں
امریکی وسط مدتی انتخابات، اکتوبر کے روزگار سے متعلق اعدادوشمار اور برطانیہ، آسٹریلیا، ناروے اور سویڈن کے مرکزی بینکوں کے فیصلے بھی عالمی مالیاتی منڈیوں پر اثرانداز ہو سکتے ہیں۔ ماہرین کے مطابق ان عوامل کے ساتھ کرپٹو مارکیٹ کی غیر یقینی صورت حال آنے والے دنوں میں عالمی کرنسیوں اور سرمایہ کاری کے رجحانات کی سمت متعین کرنے میں اہم کردار ادا کرے گی۔
