خیبرپختونخوا میں ڈینگی کے کیسز میں اضافہ، ایک ہفتے میں 179 مشتبہ اور 35 تصدیق شدہ کیسز رپورٹ
خیبرپختونخوا میں مون سون بارشوں کے دوران ڈینگی وائرس کے کیسز میں اضافہ ریکارڈ کیا گیا ہے۔ محکمہ صحت کی تازہ رپورٹ کے مطابق گزشتہ ایک ہفتے کے دوران صوبے بھر سے 179 مشتبہ جبکہ 35 تصدیق شدہ ڈینگی کیسز رپورٹ ہوئے ہیں، جس کے بعد رواں سیزن میں متاثرہ افراد کی مجموعی تعداد میں مزید اضافہ ہو گیا ہے۔
محکمہ صحت کے اعداد و شمار کے مطابق رواں سال اب تک صوبے میں 1,354 مشتبہ جبکہ 250 تصدیق شدہ ڈینگی کیسز سامنے آ چکے ہیں۔ صحت حکام کا کہنا ہے کہ مختلف اضلاع میں صورتحال پر مسلسل نظر رکھی جا رہی ہے اور متاثرہ علاقوں میں انسدادِ ڈینگی سرگرمیوں کو مزید تیز کر دیا گیا ہے۔
حکام کے مطابق ڈینگی مچھر کی افزائش کو روکنے کے لیے ہاٹ اسپاٹس میں اسپرے، لاروا سرویلنس، صفائی مہم اور آگاہی پروگرام جاری ہیں۔ متعلقہ ٹیمیں گھروں، بازاروں، تعلیمی اداروں اور دیگر حساس مقامات کا معائنہ بھی کر رہی ہیں تاکہ مچھر کی افزائش کے امکانات کو کم سے کم کیا جا سکے۔
محکمہ صحت نے شہریوں سے اپیل کی ہے کہ وہ اپنے گھروں اور اردگرد کے ماحول میں صاف پانی کھڑا نہ ہونے دیں، پانی کی ٹینکیوں اور برتنوں کو ڈھانپ کر رکھیں، غیر ضروری پانی جمع ہونے سے بچیں اور مکمل آستین والے کپڑے پہننے کے ساتھ مچھر مار اسپرے یا لوشن کا استعمال کریں۔
ماہرین صحت کے مطابق تیز بخار، جسم اور جوڑوں میں درد، آنکھوں کے پیچھے درد، جلد پر دانے یا شدید کمزوری کی صورت میں فوری طور پر قریبی اسپتال یا صحت مرکز سے رجوع کرنا چاہیے۔ بروقت تشخیص اور علاج سے ڈینگی کی پیچیدگیوں سے بچا جا سکتا ہے۔
محکمہ صحت کا کہنا ہے کہ تمام سرکاری اسپتالوں میں ڈینگی مریضوں کے لیے خصوصی انتظامات کیے گئے ہیں، جبکہ صورتحال کی مسلسل نگرانی کی جا رہی ہے تاکہ کسی بھی ممکنہ وبائی صورتحال سے مؤثر انداز میں نمٹا جا سکے۔
