روس اور یوکرین کے درمیان فضائی حملوں میں تین روزہ وقفے پر اتفاق
روس اور یوکرین کے درمیان جاری جنگ کے خاتمے کے لیے سفارتی کوششوں میں اہم پیش رفت سامنے آئی ہے، روسی صدارتی دفتر کریملن کے مطابق دونوں ممالک کے درمیان فضائی حملوں میں تین روزہ وقفے پر اتفاق ہوا ہے۔
کریملن کے مطابق یہ اتفاق امریکی صدر ڈونلڈ ٹرمپ کے خصوصی ایلچی اسٹیو وٹکوف اور جیرڈ کشنر کی روسی صدر ولادیمیر پیوٹن سے تقریباً تین گھنٹے طویل ملاقات کے دوران ہوا۔ ملاقات میں روس یوکرین جنگ کے خاتمے، ممکنہ جنگ بندی اور مستقبل کے امن معاہدے سمیت مختلف امور پر تفصیلی تبادلہ خیال کیا گیا۔
روسی صدارتی دفتر کے ترجمان نے مذاکرات کو بامعنی اور تعمیری قرار دیتے ہوئے کہا کہ فریقین نے جنگ کے خاتمے کے لیے متعدد تجاویز پر غور کیا اور ممکنہ حل کے لیے مختلف آپشنز مرتب کیے ہیں۔ امریکی ایلچیوں نے صدر پیوٹن کے مؤقف کو یوکرین کے ساتھ ہونے والے مذاکرات میں پیش کرنے کی یقین دہانی بھی کرائی۔
دوسری جانب امریکی میڈیا کے مطابق اسٹیو وٹکوف اور جیرڈ کشنر یوکرین کا دورہ کریں گے، جہاں وہ روسی مؤقف اور جنگ بندی سے متعلق تجاویز یوکرینی حکام کے سامنے رکھیں گے۔
تین روزہ فضائی وقفے کا اعلان ایسے وقت میں سامنے آیا ہے جب روس اور یوکرین کے درمیان جنگ کے خاتمے کے لیے سفارتی سرگرمیاں تیز ہو رہی ہیں۔ تاہم، عارضی جنگ بندی کو مستقل امن میں تبدیل کرنے کے لیے آئندہ مذاکرات میں دونوں فریقوں کے درمیان اہم معاملات پر اتفاق ضروری ہوگا۔
