عالمی منڈی میں سونے کی قیمت میں نمایاں اضافہ، سرمایہ کاروں کا محفوظ سرمایہ کاری کی جانب رخ
مشرقِ وسطیٰ میں بڑھتی عسکری کشیدگی اور عالمی سطح پر غیر یقینی صورتحال کے باعث سرمایہ کاروں نے سونے میں سرمایہ کاری بڑھا دی، جس کے نتیجے میں عالمی منڈی میں سونے کی قیمت میں نمایاں اضافہ ریکارڈ کیا گیا۔
منگل کے روز عالمی مارکیٹ میں اسپاٹ گولڈ کی قیمت 0.9 فیصد اضافے کے بعد 4 ہزار 42.69 ڈالر فی اونس تک پہنچ گئی، جبکہ امریکی سونے کے اگست کے فیوچر معاہدے 4 ہزار 47.40 ڈالر فی اونس پر طے پائے۔
ماہرین کے مطابق امریکا اور ایران کے درمیان جاری کشیدگی کے باعث عالمی مالیاتی منڈیوں میں غیر یقینی صورتحال برقرار ہے۔ مشرقِ وسطیٰ میں عسکری تناؤ، توانائی کی قیمتوں میں اضافے اور عالمی سطح پر مہنگائی کے خدشات نے سرمایہ کاروں کو محفوظ سرمایہ کاری کی جانب متوجہ کیا، جس سے سونے کی طلب میں اضافہ ہوا۔
تجزیہ کاروں کا کہنا ہے کہ تاجروں کی جانب سے نچلی سطح پر سونے کی خریداری کے باعث اس کی قیمت 4 ہزار ڈالر فی اونس کی سطح کے قریب مستحکم رہی، تاہم خطے میں کشیدگی مزید بڑھنے کی صورت میں سونے کی قیمتوں میں مزید اضافے کا امکان موجود ہے۔
دوسری جانب سفارتی کوششوں کی اطلاعات کے بعد عالمی منڈی میں خام تیل کی قیمتوں میں تیزی کا رجحان وقتی طور پر سست پڑا ہے، تاہم مشرقِ وسطیٰ میں جاری کشیدگی کے باعث توانائی کی عالمی منڈی میں غیر یقینی صورتحال بدستور برقرار ہے۔
معاشی ماہرین کے مطابق اگر خطے میں کشیدگی میں مزید اضافہ ہوا تو عالمی مالیاتی منڈیوں میں اتار چڑھاؤ بڑھ سکتا ہے، جبکہ سرمایہ کاروں کی جانب سے سونے میں مزید سرمایہ کاری کے نتیجے میں اس کی قیمت میں بھی اضافے کا رجحان برقرار رہنے کا امکان ہے۔
