موٹروے ایم ٹو پر ٹریفک حادثہ، دو افراد جاں بحق، دو زخمی
اسلام آباد: موٹروے ایم ٹو ساؤتھ پر فیض پور کے قریب ٹریفک حادثے میں دو افراد جاں بحق جبکہ دو زخمی ہوگئے۔ حادثہ ایک آلٹو کار کے آگے جانے والی نامعلوم گاڑی سے ٹکرانے کے باعث پیش آیا۔
ترجمان موٹروے پولیس کے مطابق حادثے کی اطلاع ملتے ہی موٹروے پولیس، ٹائیگر اسکواڈ اور ڈی ایس پی فوری طور پر جائے وقوعہ پر پہنچ گئے۔ پولیس اہلکاروں نے امدادی کارروائیوں میں حصہ لیا اور زخمیوں کو طبی امداد کے لیے جناح ہسپتال لاہور منتقل کردیا۔
ترجمان سید عمران احمد کے مطابق سیکٹر کمانڈر ایم ٹو ساؤتھ اور ڈی ایس پی بیٹ 12 بھی زخمیوں کی عیادت اور متاثرہ خاندانوں کو ضروری مدد فراہم کرنے کے لیے ہسپتال پہنچے۔ حادثے کی وجوہات اور اس میں ملوث گاڑی سے متعلق مزید تفصیلات سامنے آنا باقی ہیں۔
دوسری جانب لاہور کے علاقے ڈیفنس میں بھی ٹریفک حادثہ پیش آیا، جہاں ایک کار موٹرسائیکل سے ٹکرا گئی۔ حادثے کے نتیجے میں موٹرسائیکل پر سوار ایک شخص جاں بحق جبکہ دوسرا زخمی ہوگیا۔
رپورٹ کے مطابق حادثے کے وقت موٹرسائیکل پر دو افراد سوار تھے۔ جاں بحق ہونے والے شخص کی شناخت تاحال نہیں ہوسکی، جبکہ زخمی کی شناخت شہزاد کے نام سے ہوئی ہے۔ زخمی کو طبی امداد کے لیے ہسپتال منتقل کردیا گیا۔
حادثے کے بعد کار کا ڈرائیور موقع سے فرار ہوگیا۔ پولیس کی جانب سے واقعے کی مزید تحقیقات اور ڈرائیور کی تلاش کے حوالے سے کارروائی متوقع ہے۔
مسلسل پیش آنے والے ٹریفک حادثات کے پیش نظر ڈرائیوروں کو ہدایت کی جاتی ہے کہ وہ دورانِ سفر رفتار پر قابو رکھیں، محفوظ فاصلہ برقرار رکھیں اور ٹریفک قوانین کی پابندی کریں تاکہ قیمتی انسانی جانوں کو ضائع ہونے سے بچایا جاسکے۔
