وائٹ ہاؤس نے صدر ٹرمپ کی صحت سے متعلق تفصیلات جاری کر دیں
واشنگٹن: وائٹ ہاؤس نے امریکی صدر ڈونلڈ ٹرمپ کی صحت سے متعلق تازہ طبی تفصیلات جاری کرتے ہوئے انہیں جسمانی اور ذہنی طور پر مکمل طور پر فٹ قرار دیا ہے۔ جاری کردہ میمو کے مطابق صدر ٹرمپ کی مجموعی صحت تسلی بخش ہے اور وہ اپنے صدارتی فرائض موثر انداز میں انجام دینے کی بھرپور صلاحیت رکھتے ہیں۔
وائٹ ہاؤس کی جانب سے جاری رپورٹ میں بتایا گیا ہے کہ صدر ٹرمپ کا قلبی نظام بہترین انداز میں کام کر رہا ہے اور ان کے دل کی صحت مستحکم ہے۔ اسی طرح پھیپھڑوں کی کارکردگی بھی نارمل اور مضبوط قرار دی گئی ہے، جبکہ اعصابی نظام کے تمام اہم معائنے بھی اطمینان بخش نتائج کے حامل ہیں۔ طبی ماہرین کے مطابق صدر کی جسمانی حالت ان کی عمر کے لحاظ سے بہتر اور قابل اطمینان ہے۔
رپورٹ میں مزید کہا گیا ہے کہ صدر ٹرمپ کی تمام ضروری ویکسینیشنز بروقت مکمل کی جا چکی ہیں اور ان کی احتیاطی طبی اسکریننگز بھی باقاعدگی سے کی جا رہی ہیں۔ ڈاکٹروں نے ان کی صحت کا تفصیلی جائزہ لینے کے بعد انہیں مکمل طور پر صحت مند قرار دیا ہے۔
وائٹ ہاؤس کے مطابق صدر ٹرمپ اپنی روزمرہ مصروفیات، سرکاری اجلاسوں اور بین الاقوامی امور سے متعلق ذمہ داریوں کو معمول کے مطابق انجام دے رہے ہیں۔ طبی ٹیم نے ان کی ذہنی صحت، یادداشت اور فیصلہ سازی کی صلاحیت کا بھی جائزہ لیا، جس کے نتائج مثبت اور تسلی بخش رہے۔
حکام کا کہنا ہے کہ امریکی عوام کو صدر کی صحت کے بارے میں باقاعدگی سے آگاہ رکھا جائے گا تاکہ شفافیت برقرار رہے۔ جاری کردہ میڈیکل رپورٹ کے مطابق صدر ٹرمپ اس وقت بہترین جسمانی اور ذہنی حالت میں ہیں اور ان کی صحت سے متعلق کسی تشویش کی ضرورت نہیں۔
