پاکستان اور آسٹریلیا کے درمیان پہلا ون ڈے بارش سے متاثر ہونے کا خدشہ
راولپنڈی: پاکستان اور آسٹریلیا کے درمیان تین ایک روزہ میچوں کی سیریز کے پہلے ون ڈے کو بارش کے باعث متاثر ہونے کا خدشہ پیدا ہوگیا ہے۔ محکمہ موسمیات نے راولپنڈی اور گردونواح میں آئندہ چند گھنٹوں کے دوران بارش کی پیش گوئی کی ہے، جس سے میچ کے انعقاد پر اثر پڑ سکتا ہے۔
محکمہ موسمیات کے مطابق راولپنڈی میں آئندہ 2 سے 4 گھنٹوں کے دوران تیز ہواؤں اور گرج چمک کے ساتھ بارش کا امکان ہے۔ موسمی صورتحال کے پیش نظر شائقین کرکٹ اور دونوں ٹیموں کی نظریں موسم کی تازہ ترین صورتحال پر مرکوز ہیں۔
پاکستان اور آسٹریلیا کے درمیان تین ون ڈے میچوں پر مشتمل سیریز کا پہلا مقابلہ آج راولپنڈی کرکٹ اسٹیڈیم میں شیڈول ہے۔ دونوں ٹیمیں سیریز کا فاتحانہ آغاز کرنے کے لیے پُرعزم ہیں، تاہم بارش میچ کے دورانیے اور نتیجے پر اثر انداز ہو سکتی ہے۔
کرکٹ شائقین امید کر رہے ہیں کہ موسم سازگار رہے گا اور انہیں ایک دلچسپ مقابلہ دیکھنے کو ملے گا۔
