پہلا ون ڈے: پاکستان کا آسٹریلیا کے خلاف ٹاس جیت کر فیلڈنگ کا فیصلہ
راولپنڈی: پاکستان اور آسٹریلیا کے درمیان تین ایک روزہ میچوں پر مشتمل سیریز کے پہلے مقابلے میں قومی ٹیم نے ٹاس جیت کر پہلے فیلڈنگ کرنے کا فیصلہ کیا ہے۔ میچ راولپنڈی کرکٹ اسٹیڈیم میں کھیلا جا رہا ہے جہاں شائقین کرکٹ کی بڑی تعداد اپنی ٹیم کی حوصلہ افزائی کے لیے موجود ہے۔
قومی ٹیم کے کپتان شاہین شاہ آفریدی نے ٹاس کے موقع پر گفتگو کرتے ہوئے کہا کہ پاکستان کرکٹ ٹیم آج ون ڈے کرکٹ کی تاریخ کا اپنا ہزارواں میچ کھیل رہی ہے، جو ملکی کرکٹ کے لیے ایک تاریخی سنگ میل ہے۔ انہوں نے کہا کہ اس تاریخی میچ میں ٹیم کی قیادت کرنا ان کے لیے اعزاز کی بات ہے اور پوری ٹیم اس موقع کو یادگار بنانے کے لیے پرعزم ہے۔
شاہین آفریدی کا کہنا تھا کہ ٹیم متوازن ہے اور کھلاڑی بہترین فارم میں ہیں۔ انہوں نے امید ظاہر کی کہ قومی ٹیم عمدہ کارکردگی کا مظاہرہ کرتے ہوئے میچ میں کامیابی حاصل کرے گی۔ ان کے مطابق راولپنڈی کی وکٹ اور موسمی حالات کو مدنظر رکھتے ہوئے پہلے فیلڈنگ کا فیصلہ کیا گیا ہے۔
پاکستان کی پلیئنگ الیون میں کپتان شاہین شاہ آفریدی کے علاوہ صاحبزادہ فرحان، معاذ صداقت، بابر اعظم، غازی غوری (وکٹ کیپر)، سلمان علی آغا، عبدالصمد، شاداب خان، عرفات منہاس، حارث رؤف اور ابرار احمد شامل ہیں۔
میچ کی ایک اہم بات نوجوان آل راؤنڈر عرفات منہاس کا ون ڈے ڈیبیو ہے، جو پہلی مرتبہ قومی ٹیم کی نمائندگی کر رہے ہیں۔ شائقین اور ٹیم انتظامیہ کو ان سے اچھی کارکردگی کی توقعات وابستہ ہیں۔
دوسری جانب آسٹریلوی ٹیم بھی سیریز کا فاتحانہ آغاز کرنے کے لیے میدان میں اتری ہے، جس کے باعث دونوں ٹیموں کے درمیان دلچسپ اور سنسنی خیز مقابلے کی توقع کی جا رہی ہے۔
