پشاور میں سی ٹی ڈی کی کارروائی، فتنۃ الخوارج کے 4 دہشت گرد ہلاک

پشاور: کاؤنٹر ٹیررازم ڈیپارٹمنٹ (سی ٹی ڈی) نے پشاور کے علاقے بڈھ بیر میں کارروائی کرتے ہوئے بین الاقوامی کالعدم تنظیم فتنۃ الخوارج سے تعلق رکھنے والے 4 دہشت گردوں کو ہلاک کرنے کا دعویٰ کیا ہے۔ سی ٹی ڈی کے مطابق کارروائی کے دوران دہشت گردوں کے قبضے سے بھاری مقدار میں اسلحہ اور دیگر سامان برآمد کیا گیا۔

سی ٹی ڈی حکام کے مطابق ہلاک ہونے والے دہشت گردوں میں خارجی کمانڈر طاہر عرف معاویہ بھی شامل ہے۔ حکام کا کہنا ہے کہ طاہر عرف معاویہ اپنے ساتھیوں سمیت بڈھ بیر کے علاقے میں مبینہ طور پر دہشت گردی کی غرض سے گشت کررہا تھا، جس کی اطلاع ملنے پر سیکیورٹی اہلکاروں نے کارروائی کی۔

کارروائی کے دوران فائرنگ کا تبادلہ ہوا، جس کے نتیجے میں 4 دہشت گرد ہلاک ہوگئے۔ سی ٹی ڈی کے مطابق ہلاک دہشت گردوں کے قبضے سے تین ایس ایم جیز، ایک پستول، ہینڈ گرنیڈ، موبائل فون، تین میگزین اور متعدد کارتوس برآمد کیے گئے ہیں۔

حکام کے مطابق ایک ہلاک دہشت گرد کی جیب سے افغان شناختی کارڈ بھی برآمد ہوا، جس سے اس کا تعلق افغانستان کے صوبے کنڑ سے بتایا گیا ہے۔ سی ٹی ڈی کا کہنا ہے کہ ہلاک ہونے والے دیگر دہشت گردوں کی شناخت کا عمل جاری ہے، جبکہ ان کے ممکنہ نیٹ ورک اور دیگر ساتھیوں سے متعلق بھی معلومات اکٹھی کی جارہی ہیں۔

سی ٹی ڈی کے مطابق دہشت گردوں کے زیر استعمال دو موٹر سائیکلیں بھی قبضے میں لے لی گئی ہیں۔ جائے وقوعہ سے برآمد ہونے والے اسلحے اور دیگر شواہد کو تحویل میں لے کر مزید تفتیش کا عمل شروع کردیا گیا ہے۔

حکام نے بتایا کہ کارروائی کے دوران کچھ دہشت گرد فرار ہونے میں کامیاب ہوگئے، جن کی گرفتاری کیلئے بڈھ بیر کے مختلف علاقوں میں سرچ آپریشن جاری ہے۔ سیکیورٹی اہلکار مشتبہ مقامات کی تلاشی لے رہے ہیں اور فرار ہونے والے عناصر کی موجودگی سے متعلق معلومات حاصل کی جارہی ہیں۔

سی ٹی ڈی کے مطابق جائے وقوعہ پر کرائم سین یونٹ اور بم ڈسپوزل یونٹ (BDU) کو بھی طلب کرلیا گیا، جنہوں نے شواہد اکٹھے کرنے اور علاقے کی مکمل جانچ سمیت ضروری کارروائی شروع کردی ہے۔

دوسری جانب آئی جی پولیس ذوالفقار حمید نے کارروائی میں حصہ لینے والے سی ٹی ڈی اہلکاروں کی حوصلہ افزائی کرتے ہوئے ان کی کارکردگی کو سراہا۔ ان کا کہنا تھا کہ دہشت گرد عناصر کو صوبے میں امن و امان خراب کرنے کی اجازت نہیں دی جائے گی۔

آئی جی پولیس نے کہا کہ قانون نافذ کرنے والے ادارے دہشت گردی کے خلاف کارروائیاں جاری رکھیں گے اور جو عناصر امن و امان کو نقصان پہنچانے کی کوشش کریں گے، انہیں قانون کے مطابق کیفرِ کردار تک پہنچایا جائے گا۔

سی ٹی ڈی حکام کے مطابق بڈھ بیر میں سرچ آپریشن اور تحقیقات کا سلسلہ جاری ہے، جبکہ مزید معلومات سامنے آنے پر کارروائی سے متعلق پیش رفت سے آگاہ کیا جائے گا۔