پشاور میں بجلی چوروں کے خلاف کریک ڈاؤن، بل دینے والوں کو لوڈشیڈنگ سے ریلیف
پشاور ڈویژن میں بجلی چوری، بقایا جات اور نادہندگان کے خلاف بلاامتیاز کارروائی کا فیصلہ کرلیا گیا ہے، جبکہ باقاعدگی سے بجلی کے بل ادا کرنے والے صارفین کو غیر ضروری لوڈشیڈنگ سے بچانے کے لیے نیا طریقہ کار متعارف کرانے کی ہدایت کی گئی ہے۔
کمشنر پشاور ڈویژن ریاض خان محسود کی زیر صدارت اجلاس میں پیسکو اور ضلعی انتظامیہ کے حکام نے شرکت کی۔ اجلاس میں بجلی کے نظام میں بہتری، بجلی چوری کی روک تھام اور ریکوری کے معاملات کا جائزہ لیا گیا۔
کمشنر پشاور نے پیسکو حکام کو ہدایت کی کہ جن علاقوں میں بجلی چوری یا واجبات کی عدم ادائیگی زیادہ ہے، وہاں پورے فیڈر کی بجلی بند کرنے کے بجائے متعلقہ ٹرانسفارمر کی سطح پر لوڈشیڈنگ کی جائے۔
حکام کے مطابق اس اقدام کا مقصد ان صارفین کو غیر ضروری طویل لوڈشیڈنگ سے بچانا ہے جو باقاعدگی سے اپنے بجلی کے بل ادا کرتے ہیں۔
اجلاس میں فیصلہ کیا گیا کہ بجلی چوروں اور بڑے نادہندگان کے خلاف منگل سے بلاامتیاز کارروائی شروع کی جائے گی۔ اس مقصد کے لیے اسسٹنٹ کمشنرز کی سربراہی میں خصوصی ٹیمیں تشکیل دی گئی ہیں، جن میں پیسکو، پولیس اور ضلعی انتظامیہ کے اہلکار شامل ہوں گے۔
خصوصی ٹیمیں مختلف علاقوں میں بجلی کے غیر قانونی کنکشنز، بجلی چوری اور بقایا جات کی جانچ پڑتال کریں گی اور خلاف ورزیوں میں ملوث افراد کے خلاف قانون کے مطابق کارروائی عمل میں لائی جائے گی۔
اجلاس میں نئے بجلی میٹروں کی تنصیب کا عمل تیز کرنے اور بجلی کے واجبات کی وصولی بہتر بنانے کی بھی ہدایت کی گئی۔
کمشنر ریاض خان محسود نے پیسکو اور ضلعی انتظامیہ کے درمیان مؤثر رابطے کی ضرورت پر زور دیتے ہوئے متعلقہ حکام سے کارکردگی کی ہفتہ وار رپورٹ طلب کرلی۔
انتظامیہ کا کہنا ہے کہ بجلی چوری اور نادہندگان کے خلاف کارروائی کا مقصد نہ صرف بجلی کے نظام میں بہتری لانا ہے بلکہ باقاعدگی سے بل ادا کرنے والے شہریوں کو بھی ریلیف فراہم کرنا ہے۔
نئے طریقہ کار کے تحت امید کی جا رہی ہے کہ بجلی چوری والے علاقوں میں کارروائی کا بوجھ پورے فیڈر کے بجائے مخصوص ٹرانسفارمرز تک محدود رہے گا، جس سے بل ادا کرنے والے صارفین کو غیر ضروری لوڈشیڈنگ سے بچانے میں مدد مل سکتی ہے۔
