پشاور میں معمولاتِ زندگی بحال، بی آر ٹی سروس بھی آج سے شروع ہوگی
پشاور: خیبر پختونخوا کے دارالحکومت پشاور میں آج سے معمولاتِ زندگی بحال ہو رہے ہیں، جبکہ بی آر ٹی سروس بھی دوبارہ شروع کی جائے گی۔ ایک روزہ عام تعطیل ختم ہونے کے بعد سرکاری و نجی دفاتر اور تعلیمی اداروں میں معمول کی سرگرمیاں بحال ہوں گی۔
ضلعی انتظامیہ کے مطابق شہر کے تمام سرکاری اور نجی ادارے معمول کے مطابق کام کریں گے، جبکہ سرکاری دفاتر میں دفتری امور بھی معمول کے مطابق انجام دیے جائیں گے۔
انتظامیہ کی جانب سے تعلیمی اداروں کی دوبارہ کھلنے کی تصدیق کے بعد سرکاری و نجی اسکولوں میں تدریسی سرگرمیاں بھی بحال ہو جائیں گی۔ تعطیل کے باعث تعلیمی اور دفتری سرگرمیاں متاثر ہوئی تھیں، تاہم اب شہری معمول کے مطابق اپنے روزمرہ امور انجام دے سکیں گے۔
دوسری جانب پشاور میں شہریوں کی آمدورفت میں سہولت فراہم کرنے کے لیے بی آر ٹی سروس بھی آج سے شروع ہوگی۔ سروس کی بحالی سے روزانہ سفر کرنے والے شہریوں کو سہولت ملنے کی توقع ہے۔
عام تعطیل کے خاتمے اور ٹرانسپورٹ سروس کی بحالی کے بعد شہر میں کاروباری، تعلیمی اور دفتری سرگرمیوں میں معمول کی روانی متوقع ہے۔
