چینی کی قیمتوں کی مسلسل نگرانی کی جائے، اسحاق ڈار کی ہدایت
اسلام آباد: نائب وزیراعظم و وزیر خارجہ سینیٹر محمد اسحاق ڈار نے متعلقہ حکام کو ہدایت کی ہے کہ چینی کی قیمتوں کی مسلسل نگرانی کی جائے تاکہ عوام کو ریلیف فراہم کیا جا سکے اور مارکیٹ میں قیمتوں کو مستحکم رکھا جا سکے۔
اسحاق ڈار نے زور دیا کہ چینی کی بلا تعطل فراہمی اور مناسب قیمتوں پر دستیابی کو یقینی بنانا حکومت کی اہم ترجیحات میں شامل ہے۔ انہوں نے متعلقہ اداروں کو ہدایت کی کہ مارکیٹ میں چینی کے ذخائر، رسد اور قیمتوں کی صورتحال پر کڑی نظر رکھی جائے تاکہ کسی بھی قسم کی مصنوعی قلت یا ناجائز منافع خوری کو روکا جا سکے۔
نائب وزیراعظم کے مطابق اضافی چینی کی برآمد سے زرعی معیشت کو تقویت دینے اور قیمتی زرمبادلہ حاصل کرنے میں مدد مل سکتی ہے، تاہم اس عمل کے دوران ملکی صارفین کے مفادات کا تحفظ اولین ترجیح رہنا چاہیے۔
انہوں نے واضح کیا کہ چینی کی برآمد کے باوجود مقامی مارکیٹ میں وافر ذخائر برقرار رکھنا ضروری ہے تاکہ قومی ضروریات پوری کرنے میں کوئی رکاوٹ پیدا نہ ہو اور خوردہ قیمتوں میں اضافے کا دباؤ نہ آئے۔
وزارت خزانہ اور متعلقہ حکام کو چینی کی فراہمی کے نظام اور قیمتوں کی صورتحال کا مسلسل جائزہ لینے کی ہدایت بھی کی گئی ہے۔ حکومت کی کوشش ہے کہ مارکیٹ میں طلب اور رسد کے درمیان توازن برقرار رہے اور صارفین کو غیر ضروری مہنگائی سے محفوظ رکھا جا سکے۔
حکومت کے مطابق اشیائے ضروریہ کی قیمتوں میں استحکام اور عوام کو ریلیف فراہم کرنے کے لیے نگرانی کا عمل مزید مؤثر بنایا جائے گا، جبکہ ذخیرہ اندوزی اور ناجائز منافع خوری کی روک تھام کے لیے بھی اقدامات کیے جائیں گے۔
