ڈی سی اورکزئی یوسف علی مہمند کا ترقیاتی منصوبوں کی بروقت تکمیل کا حکم، معیار پر سمجھوتہ نہ کرنے کی ہدایت
ضلع اورکزئی میں جاری ترقیاتی منصوبوں پر پیش رفت کا جائزہ لینے کے لیے ڈپٹی کمشنر یوسف علی مہمند کی زیرِ صدارت تمام محکموں کے سربراہان کا اہم اجلاس منعقد ہوا، جس میں مختلف ترقیاتی اسکیموں کی موجودہ صورتحال اور کام کی رفتار سے متعلق تفصیلی جائزہ لیا گیا۔
اجلاس کے دوران متعلقہ محکموں کے سربراہان نے ڈپٹی کمشنر کو اپنے اپنے محکموں کے تحت جاری ترقیاتی منصوبوں کے حوالے سے تفصیلی بریفنگ دی اور منصوبوں پر ہونے والی پیش رفت سے آگاہ کیا۔
اس موقع پر ڈپٹی کمشنر یوسف علی مہمند نے تمام متعلقہ حکام کو ہدایت کی کہ جاری ترقیاتی منصوبوں کی بروقت تکمیل ہر صورت یقینی بنائی جائے اور تمام کام منظور شدہ پی سی ون (PC-I) کے مطابق مکمل کیے جائیں۔ انہوں نے واضح کیا کہ منصوبوں کی تکمیل میں غیر ضروری تاخیر برداشت نہیں کی جائے گی اور متعلقہ افسران اپنی ذمہ داریاں مؤثر انداز میں ادا کریں۔
ڈپٹی کمشنر نے ترقیاتی منصوبوں کے معیار پر خصوصی زور دیتے ہوئے کہا کہ تعمیراتی کاموں میں کسی قسم کا سمجھوتہ ہرگز قبول نہیں کیا جائے گا۔ تمام منصوبوں میں مقررہ معیار اور منظور شدہ منصوبہ بندی کے مطابق کام کو یقینی بنایا جائے تاکہ سرکاری وسائل کا درست استعمال ممکن ہو اور عوام کو ان منصوبوں کے حقیقی ثمرات مل سکیں۔
اجلاس میں اس امر پر بھی زور دیا گیا کہ متعلقہ محکموں کے سربراہان ترقیاتی سرگرمیوں کی مسلسل نگرانی کریں اور منصوبوں پر کام کی رفتار کے ساتھ ساتھ تعمیراتی معیار کو بھی یقینی بنائیں۔
ضلعی انتظامیہ کے مطابق ترقیاتی منصوبوں کی بروقت اور معیاری تکمیل سے ضلع اورکزئی میں بنیادی سہولیات کی فراہمی اور عوامی ضروریات پوری کرنے میں مدد ملے گی۔
ڈپٹی کمشنر یوسف علی مہمند نے متعلقہ افسران کو ہدایت کی کہ عوامی مفاد کے منصوبوں کو ترجیحی بنیادوں پر مکمل کیا جائے تاکہ ترقیاتی اقدامات کے ثمرات براہِ راست عام شہریوں تک پہنچ سکیں۔
