کانگو کے دو سکولوں میں آتشزدگی سے 29 طلبا جاں بحق، 300 گھر خاکستر
بوکاوو: مشرقی کانگو کے شہر بوکاوو میں خوفناک آتشزدگی کے نتیجے میں دو اسکولوں سمیت 300 گھر جل کر خاکستر ہوگئے، جبکہ آگ کی لپیٹ میں آکر 29 طلبا جھلس کر جاں بحق ہوگئے۔
مقامی حکام کے مطابق آگ نے پہلے ایک گھر کو اپنی لپیٹ میں لیا، تاہم دیکھتے ہی دیکھتے اس نے شدت اختیار کرلی اور قریبی علاقوں تک پھیل گئی۔ آگ نے دو اسکولوں سمیت بڑی تعداد میں گھروں کو اپنی لپیٹ میں لے لیا، جس کے باعث بڑے پیمانے پر مالی نقصان بھی ہوا۔
حکام کا کہنا ہے کہ آتشزدگی میں جاں بحق ہونے والے 29 طلبا میں 19 لڑکیاں اور 10 لڑکے شامل ہیں۔ واقعے کے بعد علاقے میں شدید خوف و ہراس پھیل گیا، جبکہ متاثرہ خاندانوں کو بھی بھاری نقصان کا سامنا کرنا پڑا۔
مقامی حکام کے مطابق جاں بحق بچوں کی تدفین کردی گئی ہے۔ تدفین کے موقع پر علاقے میں سوگ کی فضا رہی اور بچوں کے والدین غم سے نڈھال دکھائی دیے۔
حکام نے واقعے کی وجوہات جاننے کے لیے تحقیقات شروع کردی ہیں۔ تاہم فوری طور پر آگ لگنے کی حتمی وجہ سامنے نہیں آسکی۔ واقعے کے بعد متاثرہ علاقوں میں نقصانات کا جائزہ بھی لیا جا رہا ہے۔
