ہنگو میں سکیورٹی فورسز کا آپریشن، 7 خوارج ہلاک، کیپٹن حمزہ اکرم شہید
آئی ایس پی آر کے مطابق ہلاک خوارج سے اسلحہ و گولہ بارود برآمد، علاقے میں کلیئرنس آپریشن جاری ہے
راولپنڈی: پاک فوج کے شعبہ تعلقات عامہ (آئی ایس پی آر) کے مطابق 7 اگست 2026 کو سکیورٹی فورسز نے ضلع ہنگو میں خوارج کی موجودگی کی اطلاع پر انٹیلی جنس بیسڈ آپریشن کیا۔ کارروائی کے دوران سکیورٹی فورسز نے خوارج کے ٹھکانے کو مؤثر انداز میں نشانہ بنایا اور فائرنگ کے تبادلے میں 7 خوارج ہلاک ہوگئے۔
آئی ایس پی آر کے مطابق کارروائی کے دوران خوارج نے شدید مزاحمت کی اور اپنی جان بچانے کے لیے ایک مسجد میں پناہ لے لی۔ سکیورٹی فورسز کے مطابق خوارج نے عبادت گاہ کے تقدس کو بھی ملحوظ خاطر نہیں رکھا اور مسجد کو اپنے لیے پناہ گاہ کے طور پر استعمال کیا۔ اس کے بعد ہونے والے شدید فائرنگ کے تبادلے میں 7 خوارج مارے گئے۔
ترجمان پاک فوج کے مطابق آپریشن کے دوران کیپٹن حمزہ اکرم نے بہادری کا مظاہرہ کرتے ہوئے اپنے دستے کی قیادت فرنٹ سے کی اور خوارج کا مسلسل تعاقب جاری رکھا۔ شدید فائرنگ کے تبادلے میں 27 سالہ کیپٹن حمزہ اکرم نے بہادری سے لڑتے ہوئے جام شہادت نوش کیا۔ آئی ایس پی آر کے مطابق شہید کیپٹن حمزہ اکرم کا تعلق ضلع نارووال سے تھا۔
آئی ایس پی آر کا کہنا ہے کہ کارروائی کے دوران ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا۔ مارے گئے خوارج سکیورٹی فورسز، قانون نافذ کرنے والے اداروں کے خلاف متعدد دہشت گرد کارروائیوں میں ملوث تھے جبکہ ان پر بے گناہ شہریوں کے قتل میں بھی ملوث ہونے کا الزام تھا۔
بیان کے مطابق علاقے میں مزید ممکنہ خوارج کی موجودگی کے خاتمے کے لیے سینیٹائزیشن آپریشن جاری ہے۔ سکیورٹی فورسز علاقے کو مکمل طور پر محفوظ بنانے اور دہشت گرد عناصر کے خاتمے کے لیے کارروائیاں جاری رکھے ہوئے ہیں۔
آئی ایس پی آر نے کہا کہ سکیورٹی فورسز اور قانون نافذ کرنے والے اداروں کی جانب سے دہشت گردی کے خلاف کارروائیاں وژن ’’عزمِ استحکام‘‘ کے تحت جاری رہیں گی۔ یہ وژن وفاقی ایپکس کمیٹی برائے نیشنل ایکشن پلان کی منظوری کے بعد ملک میں دہشت گردی کے خاتمے کے لیے اختیار کیا گیا ہے۔
پاک فوج کے شعبہ تعلقات عامہ کے مطابق سکیورٹی فورسز اور قانون نافذ کرنے والے ادارے ملک سے غیر ملکی معاونت یافتہ دہشت گردی کے خاتمے کے لیے بھرپور عزم کے ساتھ کارروائیاں جاری رکھیں گے۔ آئی ایس پی آر نے واضح کیا کہ وطن کے دفاع اور عوام کے تحفظ کے لیے سکیورٹی فورسز کی قربانیاں اس عزم کو مزید مضبوط کرتی ہیں
