آئی ایم ایف سربراہ کا پاکستان کے معاشی اصلاحاتی پروگرام پر اظہار اطمینان
منیجنگ ڈائریکٹر عالمی مالیاتی فنڈ (آئی ایم ایف) کرسٹالینا جارجیوا نے پاکستان کے معاشی اصلاحاتی پروگرام پر اطمینان کا اظہار کرتے ہوئے کہا ہے کہ اصلاحات پر مسلسل اور مؤثر عملدرآمد سے ملک کی معاشی ترقی میں تیزی لانے اور عوام کے معیار زندگی کو بہتر بنانے میں مدد مل سکتی ہے۔
عرب نیوز کے مطابق کرسٹالینا جارجیوا نے کہا کہ وزیراعظم شہباز شریف کی قیادت میں اصلاحاتی پروگرام پر عملدرآمد کے نتیجے میں پاکستان میں معاشی استحکام میں بہتری آئی ہے۔ ان کے مطابق مالیاتی نظم و ضبط، بیرونی مالیاتی ذخائر اور سرمایہ کاروں کے اعتماد میں بھی بہتری دیکھی گئی ہے۔
آئی ایم ایف سربراہ نے پاکستان کی جانب سے کیے جانے والے مختلف معاشی اقدامات کا بھی ذکر کیا۔ ان اقدامات میں نئے قومی ٹیرف نظام، ملکی محصولات میں اضافے اور نجکاری کے عمل میں پیش رفت شامل ہے۔ ان کے مطابق یہ اقدامات پاکستان کی وسیع تر معاشی اصلاحات کا حصہ ہیں۔
کرسٹالینا جارجیوا کا کہنا تھا کہ پاکستان نے عالمی مالیاتی منڈیوں تک دوبارہ رسائی حاصل کرلی ہے۔ انہوں نے اس بات پر زور دیا کہ اصلاحات کے عمل کو مسلسل جاری رکھنے سے معاشی ترقی میں مزید اضافہ ممکن ہے، جس کے نتیجے میں عوام کے معیار زندگی میں بھی بہتری آسکتی ہے۔
آئی ایم ایف نے پاکستان کے لیے 7 ارب ڈالر کے اقتصادی پروگرام کے چوتھے جائزے پر مذاکرات شروع کردیے ہیں۔ اس کے ساتھ پاکستان کے لیے 1.4 ارب ڈالر کے کلائمیٹ ریزیلنس پروگرام کے تیسرے جائزے پر بھی بات چیت کا آغاز ہوگیا ہے۔
دونوں پروگراموں کے جائزوں کی کامیاب تکمیل سے پاکستان کے لیے تقریباً 1.2 ارب ڈالر کی نئی فنانسنگ کی راہ ہموار ہوسکتی ہے۔ مذاکرات کے دوران پاکستان کی جانب سے کیے گئے معاشی اقدامات، اہداف پر پیش رفت اور اصلاحاتی پروگرام پر عملدرآمد کا جائزہ لیا جائے گا۔
رپورٹ کے مطابق وزیراعظم شہباز شریف اور آئی ایم ایف کی سربراہ کرسٹالینا جارجیوا کے درمیان نیویارک میں ملاقات بھی ہوئی، جس میں پاکستان کے معاشی اصلاحاتی پروگرام اور عالمی مالیاتی ادارے کے تعاون سے جاری اقدامات پر تبادلہ خیال کیا گیا۔
ملاقات کے دوران وزیراعظم شہباز شریف نے آئی ایم ایف کے تعاون سے جاری اصلاحاتی پروگرام پر عملدرآمد جاری رکھنے کے عزم کا اظہار کیا۔ حکومت پاکستان معاشی استحکام، مالیاتی نظم و ضبط، محصولات میں اضافے اور سرمایہ کاری کے فروغ کے لیے مختلف اقدامات پر عملدرآمد کر رہی ہے۔
پاکستان اور آئی ایم ایف کے درمیان جاری جائزوں کے نتائج ملکی معیشت کے لیے اہم قرار دیے جا رہے ہیں، جبکہ مذاکرات کی کامیابی سے پاکستان کو مزید مالیاتی معاونت حاصل ہونے کا امکان ہے۔
