گوگل کا اے آئی سرچ نتائج میں بڑی تبدیلی کا اعلان، ویب سائٹس کے لنکس زیادہ نمایاں ہوں گے
گوگل نے مصنوعی ذہانت (اے آئی) پر مبنی سرچ نتائج میں تبدیلیوں کا اعلان کیا ہے، جس کے تحت ویب سائٹس اور خبروں کے لنکس کو زیادہ نمایاں جگہ دینے کی کوشش کی جائے گی۔ اس اقدام کا مقصد صارفین کو اے آئی سے تیار کردہ خلاصوں کے ساتھ اصل ویب صفحات تک رسائی کا بہتر موقع فراہم کرنا ہے۔
یہ تبدیلی ایسے وقت میں سامنے آئی ہے جب خبر رساں اداروں اور ڈیجیٹل پبلشرز نے خدشات ظاہر کیے ہیں کہ اے آئی سے تیار کردہ جوابات کے باعث صارفین براہِ راست ویب سائٹس پر کم جا رہے ہیں، جس سے ان کی ٹریفک متاثر ہو رہی ہے۔
گوگل نے 2024 میں اے آئی اوور ویوز متعارف کرائے تھے۔ اس فیچر میں صارف کے سوال کے جواب میں مختلف ذرائع سے معلومات لے کر ایک خلاصہ پیش کیا جاتا ہے۔ بعد ازاں مارچ 2025 میں کمپنی نے اے آئی موڈ بھی متعارف کرایا، جس میں صارفین تفصیلی سوالات کے جواب اور متعلقہ ویب لنکس حاصل کرسکتے ہیں۔
میڈیا اور ویب سائٹ ٹریفک کے تجزیاتی ادارے چارٹ بیٹ کی رپورٹ کے مطابق جولائی 2025 سے جولائی 2026 کے دوران گوگل سرچ کے ذریعے خبروں کی ویب سائٹس پر آنے والی ٹریفک میں 40 فیصد کمی ریکارڈ کی گئی۔ ڈیجیٹل پبلشرز کے لیے یہ صورتحال آمدن اور قارئین تک رسائی کے حوالے سے اہم چیلنج بن گئی ہے۔
اعلان کردہ تبدیلیوں کے تحت اے آئی اوور ویوز میں متعلقہ ویب سائٹس کے لنکس زیادہ نمایاں انداز میں دکھانے پر توجہ دی جائے گی۔ اس کے علاوہ لنکس، تصاویر اور سرخیوں پر مشتمل کارڈز کو اے آئی خلاصوں کے نیچے پیش کرنے کی سہولت بھی وسعت دی جائے گی، تاکہ صارفین مزید تفصیلات کے لیے اصل مضامین تک آسانی سے پہنچ سکیں۔
گوگل صارفین کے پسندیدہ ذرائع کو بھی اہمیت دینے کی کوشش کر رہا ہے، جبکہ متعلقہ مواد میں سوشل میڈیا اور آن لائن فورمز کی تحریریں بھی شامل ہوسکتی ہیں۔
کمپنی کے مطابق 2025 کی دوسری سہ ماہی تک اے آئی اوور ویوز کے ماہانہ صارفین کی تعداد 200 سے زائد ممالک میں 2 ارب سے تجاوز کرچکی تھی۔ نئی تبدیلیوں سے توقع ہے کہ صارفین کو معلومات کے اصل ذرائع تک پہنچنے میں آسانی ہوگی، جبکہ ویب سائٹس کو بھی اپنے مواد کے ذریعے قارئین تک رسائی کا بہتر موقع مل سکتا ہے۔
