خیبرپختونخوا میں امن و امان کے لیے ایڈوائزری کونسل کے ایکشن پلان پر عملدرآمد شروع
پشاور: خیبرپختونخوا میں امن و امان کی بحالی، دہشت گردی کے خاتمے اور پولیس کے نظام کو جدید خطوط پر استوار کرنے کے لیے گورنر فیصل کریم کنڈی کی سربراہی میں قائم ایڈوائزری کونسل نے عملی اقدامات شروع کردیے ہیں۔
کونسل کے ابتدائی اجلاس میں طے شدہ ترجیحات کے بعد اب التوا کا شکار ترقیاتی منصوبوں کو تیز کرنے اور فیلڈ میں فوری نتائج حاصل کرنے پر توجہ دی جا رہی ہے۔
گورنر خیبرپختونخوا فیصل کریم کنڈی نے واضح کیا ہے کہ صوبے میں امن کی بحالی، قانون کی بالادستی اور دہشت گردی کا خاتمہ حکومت کی اولین ترجیحات میں شامل ہیں۔
ایڈوائزری کونسل کے ایکشن پلان کا مقصد امن و امان کی صورتحال بہتر بنانے، پولیس کے بنیادی ڈھانچے کو مضبوط کرنے اور متعلقہ اداروں کی کارکردگی میں بہتری لانا ہے۔
صوبے میں جاری اقدامات کے تحت متعلقہ اداروں کے درمیان رابطہ کاری اور زیر التوا منصوبوں پر پیش رفت کو اہمیت دی جا رہی ہے۔ ان اقدامات کے نتائج کا انحصار عملی اقدامات، وسائل کی دستیابی اور متعلقہ محکموں کے مؤثر تعاون پر ہوگا۔
