خاتون اینکر پرسن ربیعہ احسن کی نماز جنازہ راولپنڈی میں ادا، شہریوں کی بڑی تعداد میں شرکت

راولپنڈی: نجی ٹی وی کی مقتولہ اینکر پرسن ربیعہ احسن کی نماز جنازہ راولپنڈی میں ادا کر دی گئی، جس میں اہل خانہ، عزیز و اقارب اور شہریوں کی بڑی تعداد نے شرکت کی۔

ربیعہ احسن کی نماز جنازہ جامع مسجد گلشن آباد، اڈیالہ روڈ راولپنڈی میں ادا کی گئی۔ نماز جنازہ میں شریک افراد نے مرحومہ کے لیے دعائے مغفرت کی اور اہل خانہ سے تعزیت کا اظہار کیا۔

یاد رہے کہ ربیعہ احسن گزشتہ روز مبینہ طور پر اپنے شوہر کی فائرنگ سے جاں بحق ہوئی تھیں۔ واقعے کے بعد مقتولہ کے بھائی خرم کی مدعیت میں تھانہ صدر بیرونی راولپنڈی میں قتل کا مقدمہ درج کیا گیا، جس میں پاکستان پینل کوڈ کی دفعہ 302 شامل کی گئی ہے۔

ایف آئی آر کے مطابق مقتولہ کے بھائی خرم کو فون پر اطلاع دی گئی کہ ان کی بہن ربیعہ احسن کو ان کے شوہر نے گولی مار دی ہے۔ مدعی کے مطابق اطلاع ملنے پر جب وہ موقع پر پہنچے تو ان کی بہن خون میں لت پت پڑی تھیں اور دم توڑ چکی تھیں۔

دوسری جانب پولیس کی ابتدائی تحقیقات میں واقعے کے مختلف پہلو سامنے آئے ہیں۔ پولیس کے مطابق ربیعہ احسن کی تقریباً 14 سال قبل احسن نامی شخص سے شادی ہوئی تھی۔ ابتدائی معلومات کے مطابق اہل خانہ، مقتولہ کی بیٹیوں، بہن اور والدہ نے میاں بیوی کے درمیان کسی قسم کی ناچاقی یا گھریلو تنازع کی نشاندہی نہیں کی۔

پولیس کا کہنا ہے کہ ابتدائی تفتیش کے دوران یہ بات سامنے آئی ہے کہ موسم کی تبدیلی کے باعث گھر میں گرمیوں کے کپڑے الماری میں رکھے جا رہے تھے اور سردیوں کے کپڑے نکالے جا رہے تھے، اسی دوران کپڑوں میں سے 30 بور کا ایک پستول برآمد ہوا۔

گھر میں موجود ایک گھریلو ملازم کے ابتدائی بیان کے مطابق مقتولہ کا شوہر پستول ہاتھ میں لیے ہوئے تھا کہ اسی دوران گولی چل گئی، جس سے ربیعہ احسن جاں بحق ہو گئیں۔

پولیس کے مطابق تاحال گھر کے کسی فرد نے میاں بیوی کے درمیان جھگڑے یا اختلافات کے حوالے سے بیان نہیں دیا، تاہم واقعے کو معمولی حادثہ قرار نہیں دیا جا رہا اور قتل سمیت تمام ممکنہ محرکات کا جائزہ لیا جائے گا۔

پولیس نے واقعے کی مزید تحقیقات جاری رکھنے کا عندیہ دیا ہے تاکہ فائرنگ کے اصل حالات اور ذمہ داری کا تعین کیا جا سکے۔