خیبرپختونخوا میں سکیورٹی فورسز کی بڑی کارروائیاں، متعدد دہشتگرد ہلاک، کئی ٹھکانے تباہ
پشاور: خیبرپختونخوا میں گزشتہ دو ماہ کے دوران سکیورٹی فورسز نے دہشت گردی کے خاتمے کے لیے انٹیلیجنس بیسڈ متعدد کامیاب آپریشنز کیے، جن میں کئی دہشت گرد ہلاک جبکہ ان کے متعدد ٹھکانے تباہ کر دیے گئے۔ سکیورٹی ذرائع کے مطابق کارروائیوں کے دوران دہشت گردوں سے بھاری مقدار میں اسلحہ، گولہ بارود، دیسی ساختہ بارودی مواد اور دیگر جنگی سامان بھی برآمد کیا گیا، جس سے دہشت گردوں کے نیٹ ورک کو بڑا نقصان پہنچا ہے۔
ذرائع کے مطابق شمالی وزیرستان کے علاقے کٹھی کلی میں سکیورٹی فورسز نے خفیہ اطلاعات کی بنیاد پر آپریشن کیا، جہاں دہشت گردوں کے کئی ٹھکانوں کو نشانہ بنایا گیا۔ کارروائی کے دوران متعدد دہشت گرد مارے گئے جبکہ کئی زخمی ہونے کی اطلاعات بھی موصول ہوئی ہیں۔ آپریشن کے دوران فورسز نے دہشت گردوں کی جانب سے نصب کیے گئے دیسی ساختہ بم بھی ناکارہ بنا کر تباہ کر دیے، تاکہ مقامی آبادی کو کسی ممکنہ خطرے سے محفوظ رکھا جا سکے۔
سکیورٹی ذرائع کا کہنا ہے کہ ان کارروائیوں میں جدید ٹیکنالوجی کا استعمال کیا گیا، جن میں زمینی دستوں کے ساتھ کواڈ کاپٹرز کی مدد بھی حاصل کی گئی۔ ان ذرائع کے مطابق ہر آپریشن انتہائی منصوبہ بندی کے تحت کیا گیا تاکہ دہشت گردوں کو مؤثر انداز میں نشانہ بنایا جا سکے اور شہری آبادی کو کسی قسم کا نقصان نہ پہنچے۔
اسی دوران باجوڑ کے علاقے شاکرو میں بھی سکیورٹی فورسز نے دہشت گردوں کے ٹھکانوں پر کامیاب کارروائی کی۔ ذرائع کے مطابق دہشت گردوں کی نقل و حرکت کی خفیہ اطلاعات موصول ہونے پر بروقت آپریشن کیا گیا، جس کے نتیجے میں ان کے محفوظ ٹھکانے تباہ کر دیے گئے اور دہشت گردوں کی سرگرمیوں کو شدید نقصان پہنچا۔
سکیورٹی حکام نے واضح کیا ہے کہ خیبرپختونخوا میں دہشت گردی کے مکمل خاتمے تک انٹیلیجنس بیسڈ آپریشنز کا سلسلہ جاری رہے گا۔ ان کا کہنا ہے کہ ہر کارروائی میں شہریوں کے جان و مال کے تحفظ کو اولین ترجیح دی جا رہی ہے اور اس بات کو یقینی بنایا جا رہا ہے کہ مقامی آبادی کسی بھی قسم کے نقصان سے محفوظ رہے۔
واضح رہے کہ گزشتہ روز بھی قانون نافذ کرنے والے اداروں نے ضلع ہنگو میں کامیاب کارروائی کرتے ہوئے خزینہ بانڈہ چیک پوسٹ حملے کے مبینہ ماسٹر مائنڈ کو ہلاک کر دیا تھا۔ اس حملے میں ایک ڈی ایس پی سمیت 10 پولیس اہلکار شہید جبکہ 28 افراد زخمی ہوئے تھے۔ پولیس حکام کے مطابق چھپری نریاب کے قریب 15 سے 18 دہشت گردوں کی موجودگی کی اطلاع پر کارروائی کی گئی، جس میں انتہائی مطلوب دہشت گرد مارا گیا۔
حکام کا کہنا ہے کہ دہشت گردی کے خلاف جاری آپریشنز کا مقصد صوبے میں امن و امان کی بحالی، شہریوں کا تحفظ اور دہشت گرد عناصر کا مکمل خاتمہ ہے۔ سکیورٹی فورسز اس عزم کا اعادہ کر چکی ہیں کہ ملک دشمن عناصر کے خلاف کارروائیاں بلا تعطل جاری رہیں گی۔
