حج 2027: پاکستانی عازمین کے لیے آن لائن اخراجات جمع کرانے کی سہولت متعارف
حکومت نے حج 2027 کے خواہش مند پاکستانی عازمین کے لیے بڑی سہولت متعارف کرا دی ہے، جس کے تحت اب حج اخراجات آن لائن جمع کرائے جا سکیں گے۔
وفاقی وزیر مذہبی امور سردار محمد یوسف نے آن لائن ادائیگی کے نظام کا افتتاح کیا۔ نئے نظام کے تحت ملک بھر سے عازمین حج گھر بیٹھے آن لائن اپنے حج اخراجات جمع کرا سکیں گے، جبکہ بینک کارڈ کے ذریعے بھی ادائیگی کی سہولت دستیاب ہوگی۔
وفاقی وزیر کے مطابق حج کے پورے نظام کو این آئی ٹی بی کے تعاون سے اینڈ ٹو اینڈ ڈیجیٹلائز کر دیا گیا ہے، جس کا مقصد عازمین کے لیے رجسٹریشن، ادائیگی اور دیگر مراحل کو آسان اور شفاف بنانا ہے۔
انہوں نے بتایا کہ پاک حج ایپ کے ذریعے 4 لاکھ سے زائد افراد پہلے ہی رجسٹریشن کرا چکے ہیں۔ نئی آن لائن ادائیگی کی سہولت کے بعد رجسٹرڈ عازمین کو حج اخراجات جمع کرانے کے لیے گھروں سے نکلنے کی ضرورت نہیں ہوگی۔
حکام کے مطابق حکومت کی جانب سے حج 2027 کے سرکاری اسکیم کے لیے ایک لاکھ 7 ہزار 527 نشستیں مختص کی گئی ہیں۔
آن لائن نظام کے ذریعے عازمین کو کاغذی کارروائی اور بینک یا متعلقہ دفاتر کے غیر ضروری چکروں سے نجات ملنے کی توقع ہے۔ خاص طور پر دور دراز علاقوں میں رہنے والے افراد اس سہولت سے زیادہ فائدہ اٹھا سکیں گے۔
وزارت مذہبی امور کا کہنا ہے کہ حج کے انتظامات میں جدید ٹیکنالوجی کے استعمال کا مقصد نہ صرف سہولت فراہم کرنا بلکہ پورے عمل کو زیادہ مؤثر، شفاف اور قابلِ رسائی بنانا ہے۔
حکومت کی جانب سے حج کے نظام کی ڈیجیٹلائزیشن پاکستان میں سرکاری خدمات کو آن لائن منتقل کرنے کی وسیع تر کوششوں کا بھی حصہ ہے۔ نئی سہولت کے تحت عازمین حج کے لیے رجسٹریشن اور ادائیگی کا عمل مزید آسان بنانے کی کوشش کی گئی ہے۔
