اپوزیشن کے ساتھ مذاکرات کیلئے تیار ہیں، مگر تالی دونوں ہاتھوں سے بجتی ہے: وزیراعظم
اسلام آباد: وزیراعظم شہباز شریف نے ایک بار پھر اپوزیشن کو مذاکرات کی دعوت دیتے ہوئے کہا ہے کہ حکومت بات چیت کے لیے تیار ہے، تاہم مذاکرات کے عمل کو آگے بڑھانے کے لیے دونوں فریقوں کا آمادہ ہونا ضروری ہے۔
وفاقی کابینہ کے اجلاس سے خطاب کرتے ہوئے وزیراعظم نے کہا کہ اپوزیشن کے ساتھ مذاکرات کے لیے حکومت تیار ہے، مگر تالی دونوں ہاتھوں سے بجتی ہے۔ ان کا کہنا تھا کہ اب یہ اپوزیشن پر منحصر ہے کہ وہ کب مذاکرات کی میز پر آتی ہے۔
وزیراعظم شہباز شریف نے ملکی معاشی صورتحال اور عوام کو ریلیف دینے کے حکومتی اقدامات کا بھی ذکر کیا۔ انہوں نے ڈیزل کی فی لیٹر قیمت میں 32 روپے کمی کو خوش آئند قرار دیتے ہوئے اس حوالے سے وزارتِ پٹرولیم کی کوششوں کو سراہا۔
وزیراعظم نے کہا کہ خطے کی صورتحال مسلسل تبدیل ہو رہی ہے اور کئی ممالک میں ریفائنریز اور گیس پلانٹس بند ہیں، جس کے اثرات عالمی سطح پر مرتب ہورہے ہیں۔ ان کے مطابق عالمی حالات کے اثرات پاکستان پر بھی پڑ رہے ہیں، تاہم حکومت مشکل صورتحال میں عوام کو ریلیف فراہم کرنے کے لیے اقدامات کر رہی ہے۔
شہباز شریف نے بتایا کہ عوام کو موجودہ مشکل حالات میں ریلیف دینے کے لیے حکومت نے 128 ارب روپے مختص کیے ہیں۔ ان کا کہنا تھا کہ حکومت عالمی سطح پر پیدا ہونے والے چیلنجز کے باوجود عوام کو ممکنہ ریلیف فراہم کرنے کے لیے اپنی کوششیں جاری رکھے ہوئے ہے۔
وزیراعظم کی جانب سے اپوزیشن کو مذاکرات کی تازہ دعوت ایسے وقت میں سامنے آئی ہے جب حکومت اور اپوزیشن کے درمیان سیاسی اختلافات برقرار ہیں۔ حکومت کا مؤقف ہے کہ ملک کو درپیش سیاسی اور معاشی چیلنجز سے نمٹنے کے لیے سیاسی قوتوں کے درمیان بات چیت اور اتفاقِ رائے ضروری ہے۔
شہباز شریف نے واضح کیا کہ حکومت مذاکرات کے لیے دروازے کھلے رکھے ہوئے ہے، تاہم اس عمل کو کامیاب بنانے کے لیے اپوزیشن کی جانب سے بھی مثبت پیش رفت ضروری ہوگی۔
