آئی فون 18 پرو اور پرو میکس کی پری بکنگ شروع
ٹیکنالوجی کمپنی ایپل نے اپنے نئے فلیگ شپ اسمارٹ فونز آئی فون 18 پرو اور آئی فون 18 پرو میکس کی پری بکنگ باضابطہ طور پر شروع کردی ہے۔ صارفین ایپل اسٹور کے ذریعے اپنی پسند کے ماڈل، رنگ، اسٹوریج اور دیگر کنفیگریشنز منتخب کرکے پری آرڈر دے سکتے ہیں۔
رپورٹ کے مطابق ایپل نے نئے آئی فونز کی پری بکنگ کے لیے آن لائن اسٹور پر قطار کا نیا نظام متعارف کرایا ہے۔ اس نظام کے تحت صارفین کو آرڈر پیج تک رسائی کے لیے اپنی باری کا انتظار کرنا ہوگا، جس کے بعد وہ خریداری کا عمل مکمل کرسکیں گے۔
ایپل نے پری بکنگ شروع ہونے سے قبل صارفین کو آرڈر کی تیاری کا آپشن بھی فراہم کیا تھا۔ اس سہولت کے ذریعے خریدار اپنی پسندیدہ کنفیگریشن اور ادائیگی کا طریقہ پہلے سے منتخب کرسکتے تھے، جس سے چیک آؤٹ کا عمل تیز ہونے کی توقع ہے۔
رپورٹ کے مطابق پری آرڈرز بحرالکاہل کے وقت کے مطابق صبح 5 بجے جبکہ مشرقی وقت کے مطابق صبح 8 بجے شروع ہوئے۔ تاہم مختلف علاقوں اور صارفین کے لیے ایپل اسٹور تک رسائی کے اوقات میں فرق ہوسکتا ہے۔
نئے آئی فونز کی مقبول کنفیگریشنز، رنگوں اور زیادہ اسٹوریج والے ماڈلز کی طلب بڑھنے کی صورت میں ڈیلیوری میں تاخیر کا بھی امکان ظاہر کیا گیا ہے۔
واضح رہے کہ آئی فون 18 پرو سیریز کی ابتدائی قیمت 1199 ڈالر مقرر کی گئی ہے۔
