ایک روز کے وقفے کے بعد عالمی اور مقامی مارکیٹ میں سونے اور چاندی کی قیمتوں میں نمایاں کمی ریکارڈ کی گئی ہے، جس سے خریداروں کو وقتی ریلیف ملا ہے۔ تاہم کمی کے باوجود پاکستان میں سونے کی قیمت اب بھی بلند سطح پر برقرار ہے اور فی تولہ قیمت پانچ لاکھ روپے سے اوپر ہی ہے۔
تفصیلات کے مطابق 24 قیراط فی تولہ سونا 4900 روپے سستا ہو کر 501,162 روپے تک آ گیا ہے۔ اسی طرح 10 گرام سونے کی قیمت میں بھی کمی دیکھنے میں آئی، جو 4201 روپے کم ہو کر 429,665 روپے پر پہنچ گئی۔ قیمتوں میں اس کمی کے باوجود سونا اب بھی تاریخی طور پر مہنگی سطح پر فروخت ہو رہا ہے، جس کی وجہ عالمی مارکیٹ میں اتار چڑھاؤ اور مقامی معاشی عوامل بتائے جا رہے ہیں۔
دوسری جانب چاندی کی قیمت میں بھی کمی ہوئی ہے۔ فی تولہ چاندی 145 روپے سستی ہو کر 8,417 روپے کی سطح پر آ گئی ہے، جس سے زیورات کے خریداروں کو کچھ حد تک فائدہ پہنچنے کی توقع ہے۔
بین الاقوامی مارکیٹ میں بھی سونے کی قیمت میں کمی دیکھنے میں آئی، جہاں فی اونس سونا 49 ڈالر کم ہو کر 4,788 ڈالر پر آ گیا۔ ماہرین کے مطابق عالمی سطح پر قیمتوں میں کمی کا اثر مقامی مارکیٹ پر بھی پڑا ہے، تاہم مستقبل میں قیمتوں کا دارومدار عالمی معاشی صورتحال اور کرنسی مارکیٹ کی کارکردگی پر ہوگا۔
