بطور کپتان اچھی کرکٹ کھیلنے اور بہتر فیصلے کرنے کی کوشش ہوگی، بابر اعظم

راولپنڈی: پاکستان ٹیسٹ ٹیم کے کپتان بابر اعظم نے کہا ہے کہ بطور کپتان ان کی کوشش ہوگی کہ وہ خود بھی اچھی کرکٹ کھیلیں اور میدان میں بہتر فیصلے کریں۔ ماضی کی غلطیوں سے سیکھنا ضروری ہے کیونکہ کوئی بھی ٹیم ہر وقت بہترین اور پرفیکٹ کرکٹ نہیں کھیل سکتی، تاہم محنت اور بہتری کا عمل جاری رہنا چاہیے۔

راولپنڈی میں پریس کانفرنس کرتے ہوئے بابر اعظم نے کہا کہ ان کا ماننا ہے کہ جتنا زیادہ کھیلیں گے، اتنی ہی بہتر کارکردگی دکھانے کے مواقع ملیں گے۔ وہ روزانہ اپنی کرکٹ میں بہتری لانے کی کوشش کرتے ہیں اور کوچز کے ساتھ بیٹھ کر اپنی خامیوں پر بھی کام کر رہے ہیں۔

قومی ٹیسٹ کپتان کا کہنا تھا کہ ٹیم میں 8 سے 9 نئے کھلاڑی شامل کیے گئے ہیں، جبکہ نوجوان کھلاڑیوں کو مواقع دینا اور ان سے بہترین کارکردگی حاصل کرنا ان کی ذمہ داری ہے۔ ان کھلاڑیوں کو اعتماد دینا اور ٹیم کے ماحول میں بہتر انداز سے ایڈجسٹ کرنا بھی اہم ہوگا۔

انہوں نے کہا کہ آنے والی ٹیسٹ سیریز قومی ٹیم کے لیے انتہائی اہمیت رکھتی ہے اور تمام کھلاڑی اس کے لیے بھرپور محنت کر رہے ہیں۔ ٹیم کی توجہ مثبت کرکٹ کھیلنے اور اپنی صلاحیتوں کے مطابق بہترین کارکردگی دکھانے پر مرکوز ہے۔

بابر اعظم نے کہا کہ انسان ہو یا کھلاڑی، ہر کوئی غلطی کرتا ہے اور کوئی بھی مکمل طور پر پرفیکٹ نہیں ہوتا۔ اہم بات یہ ہے کہ کھلاڑی اپنی غلطیوں کو تسلیم کریں اور ان سے سیکھ کر آئندہ بہتر کارکردگی دکھانے کی کوشش کریں۔ ہر روز ایک جیسی غلطی نہیں ہوتی، کبھی ایک گیند پر مختلف نوعیت کی غلطی ہوتی ہے اور کبھی اگلی گیند پر کوئی دوسری غلطی سامنے آتی ہے۔

کپتانی کے حوالے سے ان کا کہنا تھا کہ میدان میں درست وقت پر درست فیصلہ کرنا ضروری ہوتا ہے، مثلاً کس موقع پر کس بولر کو استعمال کرنا ہے اور کس بیٹر کو میدان میں اتارنا ہے۔ ان تمام پہلوؤں پر منصوبہ بندی کی جا رہی ہے تاکہ ٹیم بہتر نتائج حاصل کر سکے۔

کھلاڑیوں کے انتخاب اور انہیں ڈراپ کیے جانے سے متعلق سوال پر بابر اعظم نے واضح کیا کہ کسی کھلاڑی کو منتخب کرنا یا ٹیم سے باہر کرنا سلیکٹرز کا اختیار ہے۔ ان کی ذمہ داری منتخب کھلاڑیوں کو اعتماد دینا اور ان کی کارکردگی بہتر بنانے میں مدد کرنا ہے۔

مداحوں کی توقعات پر بات کرتے ہوئے بابر اعظم نے کہا کہ وہ جانتے ہیں کہ شائقین ان سے اچھی کارکردگی کی امید رکھتے ہیں اور ان کی ہمیشہ کوشش ہوتی ہے کہ مداحوں کی توقعات پر پورا اتریں۔

انہوں نے سابق کپتان اور مایہ ناز بلے باز محمد یوسف کو پاکستان کے بہترین اور لیجنڈری کھلاڑیوں میں سے ایک قرار دیا۔ اپنی بیٹنگ کے حوالے سے بابر اعظم کا کہنا تھا کہ جب بھی وہ آؤٹ ہوتے ہیں تو اس میں ان کی اپنی غلطی ہوتی ہے اور کھلاڑی کو اپنی وکٹ کی ذمہ داری خود قبول کرنی چاہیے۔

انہوں نے ایک بار پھر اس عزم کا اظہار کیا کہ ٹیم ماضی کے تجربات سے سیکھتے ہوئے محنت جاری رکھے گی اور آئندہ مقابلوں میں بہتر کرکٹ کھیلنے کی کوشش کرے گی۔