جامشورو میں فیکٹری مزدور مشین کی زد میں آکر جاں بحق
جامشورو: اندرون سندھ کے علاقے نوری آباد صنعتی زون میں فیکٹری کا 21 سالہ مزدور مشین کی زد میں آکر جاں بحق ہوگیا۔
پولیس حکام کے مطابق حادثہ نوری آباد صنعتی زون میں پیش آیا، جہاں سلام اللہ نامی مزدور فیکٹری میں کام کررہا تھا کہ اچانک مشین کی زد میں آگیا۔ حادثہ اتنا شدید تھا کہ مزدور موقع پر ہی دم توڑ گیا۔
واقعے کی اطلاع ملنے پر پولیس موقع پر پہنچ گئی اور لاش کو تحویل میں لے کر اسپتال منتقل کردیا۔ پولیس کے مطابق ضروری قانونی کارروائی مکمل کرنے کے بعد لاش ورثا کے حوالے کی جائے گی۔
پولیس حکام کا کہنا ہے کہ حادثے کی وجوہات جاننے کے لیے شواہد کی روشنی میں مزید تحقیقات جاری ہیں۔ واقعے کے حوالے سے فیکٹری انتظامیہ سے بھی معلومات حاصل کی جارہی ہیں تاکہ حادثے کی مکمل صورتحال سامنے آسکے۔
